കണ്ണൂർ: പയ്യന്നൂർ കോൺഗ്രസ് ബ്ലോക്ക് കമ്മറ്റി ഓഫീസിലെ ഗാന്ധി പ്രതിമ തകർത്ത സംഭവത്തിൽ 2 ഡിവൈഎഫ്ഐ പ്രവർത്തകർ അറസ്റ്റിൽ. താനിശേരി സ്വദേശി ടി. അമൽ, മുരുക്കുവൽ സ്വദേശി എം.വി.അഖിൽ എന്നിവരാണ് അറസ്റ്റിലായത്.
സംഭവം നടന്ന് രണ്ടാഴ്ചയ്ക്ക് ശേഷമാണ് പോലിസ് രണ്ടുപേരെയെങ്കിലും പിടികൂടിയത്. രണ്ടാഴ്ച കഴിഞ്ഞിട്ടും പ്രതികളെ പിടികൂടാൻ കഴിയാത്തത് മാദ്ധ്യമങ്ങളും വാർത്തയാക്കിയിരുന്നു ഇതിന് പിന്നാലെയാണ് അറസ്റ്റ്. ജാമ്യമില്ലാ വകുപ്പുകൾ പ്രകാരമാണ് പ്രതികൾക്കെതിരെ കേസ് എടുത്തിരുന്നത്.
കഴിഞ്ഞ 13 ന് രാത്രിയാണ് ഗാന്ധി പ്രതിമയുടെ തല അറുത്തത്. സ്വപ്നയുടെ വെളിപ്പെടുത്തലിന്റെ പശ്ചാത്തലത്തിൽ മുഖ്യമന്ത്രിക്കെതിരെ വിമാനത്തിൽ പ്രതിഷേധം അരങ്ങേറിയതിന് പിന്നാലെയായിരുന്നു സംഭവം. ഓഫീസിന്റെ ജന്നൽചില്ലുകളും ഫർണീച്ചറും അടിച്ചു തകർത്തിരുന്നു.
പ്രതികളെ പിടികൂടിയില്ലെങ്കിൽ ഡിവൈഎസ്പി ഓഫീസിലേക്ക് മാർച്ച് അടക്കമുളള പ്രതിഷേധ പരിപാടികളിലേക്ക് നീങ്ങുമെന്ന് കോൺഗ്രസും മുന്നറിയിപ്പ് നൽകിയിരുന്നു.
