ദീർഘകാലം ജീവിക്കാൻ ആഗ്രഹിക്കുന്നവർക്ക് വേണ്ടുന്ന ഒന്നാണ് ആരോഗ്യം. ശാരീരികവും മാനസികവുമായി ആരോഗ്യത്തോടെയിരുന്നാൽ മാത്രമേ ദീർഘായുസ്സ് ലഭിക്കൂവെന്നാണ് കരുതപ്പെടുന്നത്. ഇത്തരത്തിലുള്ള ആരോഗ്യത്തിന് വേണ്ടുന്ന ഒന്നാണ് ശുദ്ധിയും വൃത്തിയും. നിത്യേന ശുദ്ധിയോടെയും വൃത്തിയോടെയും ഇരുന്നാൽ കൂടുതൽ കാലം ആരോഗ്യത്തോടെ ജീവിക്കുകയും ചെയ്യാം.. എപ്രകാരമാണ് ജീവിതത്തിൽ ശുദ്ധിയും വൃത്തിയും പാലിക്കാൻ ശ്രദ്ധിക്കേണ്ടതെന്ന് നോക്കാം..
കളങ്കമില്ലാതെ, അസത്യം പറയാതെ, പാപം ചെയ്യാതെ ജീവിക്കുമ്പോൾ നമുക്ക് ശുദ്ധി ലഭിക്കുന്നു. പാപഭാരമില്ലാതെ ജീവിക്കുന്നവരുടെ മനസിന് സമ്മർദ്ദം കുറയുകയും കൂടുതൽ മാനസികാരോഗ്യം ലഭിക്കുകയും ചെയ്യുന്നുവെന്നാണ് പഠനങ്ങൾ സൂചിപ്പിക്കുന്നത്. അസത്യം പറയുമ്പോൾ മനസിന് അസ്വസ്ഥതയുണ്ടാകും. ഇത് മനസിന് ഉൾക്കിടിലം ഉണ്ടാക്കിയേക്കാം. നാം ചെയ്യുന്ന പ്രവൃത്തികൾ കളങ്കരഹിതമാകുമ്പോൾ ഇത്തരത്തിലുള്ള മാനസിക സമ്മർദ്ദങ്ങൾ ഒഴിവാകുകയും അതുവഴി ശാന്തിയും സമാധാനവും ലഭിക്കുകയും ചെയ്യും. അതിനാൽ ശുദ്ധിയോടെ നിത്യജീവിതം പുലർത്തുമ്പോൾ മാനസികാരോഗ്യം കൂടുതൽ ബലപ്പെടുന്നുവെന്നാണ് ആരോഗ്യവിദഗ്ധർ വ്യക്തമാക്കുന്നത്.
അതുപോലെ തന്നെയാണ് വൃത്തിയുടെ കാര്യവും. വ്യക്തിഗത ശുചിത്വവും പരിസര ശുചിത്വവും നമുക്ക് ആവശ്യമാണ്. ഇതിൽ ഏറ്റവും നിർബന്ധമായി വേണ്ടുന്ന ഒന്നാണ് വ്യക്തിഗത ശുചിത്വം. ശരീരം വൃത്തിയായി സൂക്ഷിക്കുക, കഴിവതും രണ്ടുനേരം കുളിക്കുക, നഖങ്ങൾ കൃത്യമായ ഇടവേളകളിൽ വെട്ടി സൂക്ഷിക്കുക, പുറത്തുപോയി തിരികെയെത്തിയാൽ ദേഹം വൃത്തിയാക്കുക തുടങ്ങിയ ശീലങ്ങൾ പതിവാക്കുന്നത് വ്യക്തിഗത ശുചിത്വം ലഭിക്കുന്നതിനും രോഗങ്ങൾ അകലുന്നതിനും സഹായിക്കും.
വ്യക്തിഗത ശുചിത്വത്തിനൊപ്പം വേണ്ടുന്ന ഒന്നാണ് പരിസര ശുചിത്വവും. നാം പെരുമാറുന്ന ഇടങ്ങൾ വൃത്തിയായി സൂക്ഷിക്കുക. നാം നിൽക്കുന്ന വീട്, പരിസരം എന്നിവ വൃത്തിയാക്കാൻ ശ്രദ്ധിക്കുക. ചപ്പുചവറുകൾ കത്തിക്കുക, മുറ്റം അടിച്ച് വൃത്തിയാക്കുക, പെരുമാറുന്ന ഇടങ്ങൾ കാടുപിടിക്കാതെ ശ്രദ്ധിക്കുക എന്നിവയെല്ലാം പരിസര ശുചിത്വം പാലിക്കാൻ സഹായിക്കുന്നു. നമുക്കും നാം ഇടപഴകുന്ന പരിസരത്തിനും വൃത്തിയുണ്ടാകുമ്പോൾ രോഗങ്ങൾ അകന്നുനിൽക്കുകയും അതുവഴി ആരോഗ്യം കൈവരിക്കാനും സാധിക്കുന്നു.
Comments