അഭിപ്രായ സ്വാതന്ത്യം ഹിന്ദു ദൈവങ്ങൾക്ക് മാത്രമായി മാറ്റി വച്ചിരിക്കുകയാണോ?; കാളിദേവി പുകവലിയ്‌ക്കുന്ന പോസ്റ്ററിനെതിരെ രൂക്ഷവിമർശനവുമായി ശിവസേന എംപി- Shiv Sena MP Priyanka Chaturvedi criticised the Kaali poster

മുംബൈ: കാളി ദേവി പുകവലിയ്‌ക്കുന്ന പോസ്റ്ററിനെതിരെ രൂക്ഷവിമർശനവുമായി ശിവസേന എംപി പ്രിയങ്ക ചതുർവേദി. എല്ലായ്‌പ്പോഴും ഹിന്ദു ദൈവങ്ങളുടെ പേരിൽ മാത്രം അഭിപ്രായസ്വാതന്ത്ര്യം പ്രകടമാക്കുന്നത് അംഗീകരിക്കാനാകില്ലെന്ന് പ്രിയങ്ക ചതുർവേദി പറഞ്ഞു. ഹിന്ദു ദൈവങ്ങളുടെ പേരിൽ മാത്രമാണ് പലരും അവരുടെ അഭിപ്രായ പ്രകടനം നടത്തുന്നത്. ഇതിനെ ഒരിക്കലും അംഗീകരിക്കാനാകില്ല. അഭിപ്രായസ്വാതന്ത്ര്യം എന്നത് അവർക്കായി മാത്രം മാറ്റി വച്ചിരിക്കുന്ന ഒന്നല്ല. മതപരമായ വികാരങ്ങളെ എല്ലാവരും ബഹുമാനിക്കണം.

മാ കാളി സിനിമയുടെ ഭാഗമായി പുറത്തിറക്കിയ കാളിദേവിയുടെ പോസ്റ്റർ എന്നെ അങ്ങേയറ്റം അസ്വസ്ഥമാക്കുന്നു. ബഹുമാനം എന്നത് എല്ലാവർക്കും തുല്ല്യമായിരിക്കണമെന്നും പ്രിയങ്ക ആരോപിച്ചു. സംവിധായിക ലീന മണിമേഖലയാണ് കഴിഞ്ഞ ദിവസം വിവാദ പോസ്റ്റർ പങ്കു വച്ചത്.

കാളിദേവിയുടെ വേഷം ധരിച്ച സ്ത്രീ പുകവലിക്കുന്ന ചിത്രമാണ് പോസ്റ്ററിലുള്ളത്. എൽജിബിടി സമൂഹത്തിന്റെ പതാകയും ചിത്രത്തിൽ കാണാം. ഇതിന് പിന്നാലെ ഇവർക്കെതിരെ വലിയ തോതിൽ വിമർശനങ്ങൾ ഉയരുകയായിരുന്നു. ഇവരുടെ അറസ്റ്റ് ആവശ്യപ്പെട്ട് ‘അറസ്റ്റ്‌ലീനമണിമേഖല’ എന്ന ഹാഷ് ടാഗും ട്വിറ്ററിൽ ട്രെൻഡിംഗ് ആണ്. എന്നാൽ പ്രതിഷേധങ്ങളെ ഭയക്കുന്നില്ലെന്ന് ലീന മണിമേഖല ട്വീറ്റ് ചെയ്തു. അറസ്റ്റ് ലീന മണിമേഖല എന്ന ഹാഷ്ടാഗിന് പകരം ലവ് യു ലീന മണിമേഖല എന്ന ഹാഷ്ടാഗ് എല്ലാവരും ഇടണമെന്നും ഇവർ ആവശ്യപ്പെടുന്നു.