കോഴിക്കോട്: രാജ്യസഭയിലേക്ക് നാമനിർദ്ദേശം ചെയ്തതിന് പ്രധാനമന്ത്രി നരേന്ദ്രമോദിക്ക്
നന്ദി പറഞ്ഞ് ഒളിമ്പ്യൻ പി.ടി ഉഷ. സമൂഹമാദ്ധ്യമങ്ങളിലൂടെ പ്രധാനമന്ത്രിയുടെ അനുമോദനം പങ്കുവെച്ചുകൊണ്ടായിരുന്നു ഉഷയുടെ പ്രതികരണം.
‘സർ, അങ്ങയുടെ വാക്കുകൾ ആഴത്തിൽ സ്പർശിക്കുന്നു. രാജ്യസഭയിലേക്ക് നാമനിർദ്ദേശം ചെയ്തതിന് എന്റെ ആത്മാർത്ഥമായ നന്ദി. എന്നെ ഏൽപിച്ച ഉത്തരവാദിത്വം ഏറ്റവും മികച്ച രീതിയിൽ എല്ലായ്‌പോഴും നിർവ്വഹിക്കും. എല്ലാ ഇന്ത്യക്കാരുടെയും പുരോഗതിക്കായി പ്രവർത്തിക്കും. ജയ് ഹിന്ദ്’ അവർ കുറിച്ചു.
ഇന്നലെയാണ് പിടി ഉഷയും സംഗീതസംവിധായകൻ ഇളയരാജയും ഉൾപ്പെടെ നാല് പേരെ രാജ്യസഭയിലേക്ക് കേന്ദ്രസർക്കാർ നാമനിർദ്ദേശം ചെയ്തത്. മനുഷ്യസ്നേഹിയും സാമൂഹിക പ്രവർത്തകനുമായ വീരേന്ദ്ര ഹെഗ്ഗഡെ, ചലച്ചിത്ര സംവിധായകനും തിരക്കഥാകൃത്തുമായ വി. വിജയേന്ദ്ര പ്രസാദ് എന്നിവരെയും ഇവർക്കൊപ്പം രാജ്യസഭയിലേക്ക് നാമനിർദ്ദേശം ചെയ്തിരുന്നു.
പിടി ഉഷ ഓരോ ഇന്ത്യക്കാരനും പ്രചോദനമാണെന്നും സ്പോർട്സിലെ അവരുടെ നേട്ടങ്ങൾ ഏറെ അറിയപ്പെടുന്നതാണെന്നും പ്രധാനമന്ത്രി കുറിച്ചിരുന്നു. വളർന്നുവരുന്ന അത്ലറ്റുകൾക്ക് വർഷങ്ങളായി മാർഗദർശനം നൽകുന്ന ഉഷയുടെ പ്രവർത്തനവും പ്രശംസനീയമാണെന്നും പ്രധാനമന്ത്രി കൂട്ടിച്ചേർത്തു.
സമൂഹത്തിന്റെ നാനാമേഖലകളിൽ നിന്നും പി.ടി ഉഷയ്‌ക്ക് അഭിനന്ദന പ്രവാഹമാണ് ലഭിക്കുന്നത്.
