മുംബൈ: കാളിദേവിയെ അപകീർത്തികരമായി ചിത്രീകരിച്ച് പോസ്റ്റർ പുറത്തിറക്കിയ സംഭവത്തിൽ വിവാദം ശക്തമായതിന് പിന്നാലെ മധ്യപ്രദേശ് പോലീസ് ലീന മണിമേഖലയ്‌ക്കെതിരെ ലുക്കൗട്ട് നോട്ടീസ് പുറപ്പെടുവിച്ചു. ഇവർക്കെതിരെ ലുക്കൗട്ട് നോട്ടീസ് പുറപ്പെടുവിക്കാൻ കേന്ദ്രത്തോട് ആവശ്യപ്പെടുമെന്ന് മധ്യപ്രദേശ് ആഭ്യന്തര മന്ത്രി നരോത്തം മിശ്ര വ്യക്തമാക്കി മണിക്കൂറുകൾക്കുള്ളിലാണ് നീക്കം.
കാളിദേവിയെ മോശമായി ചിത്രീകരിക്കുന്ന പോസ്റ്റർ ബോധപൂർവ്വമായ ശ്രമത്തിന്റെ ഭാഗമാണെന്ന് മിശ്ര ആരോപിച്ചിരുന്നു. ഹിന്ദുക്കളുടെ മതവികാരം വ്രണപ്പെടുത്തുന്ന തരത്തിൽ ചിലർ നടത്തിയ അപകീർത്തികരമായ പരാമർശങ്ങൾ പരിശോധിക്കണമെന്ന് ആവശ്യപ്പെട്ട് ട്വിറ്ററിന് കത്തയക്കുമെന്നും അദ്ദേഹം പറഞ്ഞിരുന്നു.
‘ഈ വിഷയത്തിൽ ട്വിറ്ററിന് കത്ത് എഴുതാൻ പോവുകയാണ്. ലീന മണിമേഖലയെ പോലെ, കാളി ദേവി പുകവലിക്കുന്ന ഫോട്ടോ പോസ്റ്റ് ചെയ്യുന്ന വികൃതമായ മാനസികാവസ്ഥയുള്ള ആളുകളുടെ ട്വീറ്റുകൾ ട്വിറ്റർ പരിശോധിക്കണം. ഹിന്ദുക്കളുടെ വികാരം വ്രണപ്പെടുത്താനുള്ള ഉപകരണമായി അവർ ട്വിറ്ററിനെ ഉപയോഗിക്കുന്നു. ഇവർക്കെതിരെ ലുക്കൗട്ട് നോട്ടീസ് ഇറക്കുന്നതിന് മധ്യപ്രദേശ് സർക്കാർ കേന്ദ്രത്തിന് കത്തെഴുതുമെന്നും’ അദ്ദേഹം പറഞ്ഞു.
Comments