സമയം കിട്ടുമ്പോൾ കാണണമെന്ന് ആർ ശ്രീലേഖ; സംസാരിച്ചതിൽ സന്തോഷമെന്ന് ദിലീപ്; ഇരുവരുടേതുമെന്ന് കരുതുന്ന വാട്‌സ്ആപ്പ് ചാറ്റുകൾ പുറത്ത്

കൊച്ചി : മുൻ ജയിൽ ഡിജിപി ആർ ശ്രീലേഖയുമായി നടൻ ദിലീപ് നടത്തിയത് എന്ന് സംശയിക്കുന്ന വാട്‌സ്ആപ്പ് ചാറ്റ് പുറത്ത്. ഒരു വർഷം മുൻപ് അയച്ച സന്ദേശങ്ങളാണ് പുറത്തുവന്നിരിക്കുന്നത്. ഇവർ തമ്മിലുള്ള ബന്ധം വ്യക്തമാക്കുന്ന തരത്തിലുളള ചാറ്റാണ് ഇത്.

ദിലീപിനെ പിന്തുണച്ചുകൊണ്ട് ശ്രീലേഖ രംഗത്തെത്തിയതിന് പിന്നാലെയാണ് ചാറ്റ് പുറത്തുവന്നിരിക്കുന്നത്. 2021 മേയ് 23 ന് അയച്ച സന്ദേശങ്ങളാണിവ. തന്റെ യുട്യൂബ് ചാനലിനെക്കുറിച്ച് ശ്രീലേഖ സംസാരിക്കുന്നതും സമയം കിട്ടുമ്പോൾ കാണണമെന്ന് ദിലീപിനോട് നിർദ്ദേശിക്കുന്നതും ചാറ്റിൽ കാണാം. ശ്രീലേഖയോട് സംസാരിക്കാൻ കഴിഞ്ഞതിൽ ദിലീപും സന്തോഷം പ്രകടിപ്പിക്കുന്നു.

വാട്‌സ്ആപ്പ് ചാറ്റുകളുടെ ആധികാരികത ഇതുവരെ ഉറപ്പിക്കാനായിട്ടില്ല. ഇക്കാര്യവും അന്വേഷണ സംഘം പരിശോധിക്കുമെന്നാണ് വിവരം. അതേസമയം മുൻ ഡിജിപി ആർ ശ്രീലേഖ ഐപിഎസിന്റെ മൊഴിയെടുക്കാനും അന്വേഷണ സംഘം നീക്കം ആരംഭിച്ചിട്ടുണ്ട്. ഇത് സംബന്ധിച്ച് ഉന്നതരിൽ നിന്നും നിയമോപദേശം തേടി. ശ്രീലേഖയുടെ പ്രസ്താവനകൾ പരിശോധിച്ച് വ്യക്തത വരുത്താനാണ് തീരുമാനം.

ദിലീപിനെ അനുകൂലിച്ചുകൊണ്ട് നിർണായക വെളിപ്പെടുത്തൽ നടത്തിയ ശ്രീലേഖയുടെ മൊഴി രേഖപ്പെടുത്താതിരുന്നാൽ തുടർ വിസ്താരത്തിൽ പ്രതിഭാഗം ഇത് ഉപയോഗിക്കാൻ സാധ്യതയുണ്ട്. ഈ സാഹചര്യത്തിലാണ് നിയമനടപടികളുമായി മുന്നോട്ട് പോകുന്നത്.