കൊച്ചിയിലെ മാലിന്യകൂമ്പാരത്തിൽ ദേശീയ പതാക; സല്യൂട്ട് നൽകി തിരിച്ചെടുത്ത് പോലീസ് ഉദ്യോഗസ്ഥൻ; അഭിനന്ദനപ്രവാഹം

കൊച്ചി: കൊച്ചിയിലെ മാലിന്യ കൂമ്പാരത്തിൽ കിടക്കുന്ന ദേശീയ പതാകയ്‌ക്ക് സല്യൂട്ട് നൽകിയ പോലീസ് ഉദ്യോഗസ്ഥന്റെ ചിത്രം സമൂഹമാദ്ധ്യമങ്ങളിൽ വൈറലായിരുന്നു. സിവിൽ പോലീസ് ഓഫിസർ ടി.കെ.അമലാണ് മാലിന്യത്തിൽ കിടന്ന ദേശീയ പതാകയെ ആദരിച്ച് അത് സൂക്ഷ്മമായി മടക്കിയെടുത്തത്. ഈ ചിത്രങ്ങൾ പ്രചരിച്ചതോടെ അദ്ദേഹത്തിന് അഭിനന്ദന പ്രവാഹമാണ്. ഇന്ന് രാവിലെയോടെ ഡിസിപി അദ്ദേഹത്തെ പ്രത്യേകം അഭിനന്ദിച്ചു. മേജർ രവി ഉൾപ്പെടെയുള്ള പലരും നേരിട്ടെത്തിയും അഭിനന്ദനം അറയിച്ചു.

ഇന്നലെ രാവിലെയോടെയാണ് ദേശീയ പതാക ഉപേക്ഷിക്കപ്പെട്ട നിലയിൽ നാട്ടുകാർ കണ്ടെത്തിയത്. ശ്മശാനത്തിന് സമീപത്ത് ടിപ്പറിൽ കൊണ്ടുവന്ന് തള്ളിയ മാലിന്യത്തിൽ ഇത് കണ്ടെത്തിയതോടെ നാട്ടുകാരും ജനപ്രതിനിധികളും സ്ഥലത്തെത്തി. തുടർന്ന് ഈ വിവരം പോലീസിൽ അറിയിക്കുകയായിരുന്നു. മാലിന്യത്തിൽ ദേശീയ പതാകകൾക്കൊപ്പം കോസ്റ്റ് ഗാർഡിന്റെ പതാകകളും ഉണ്ടായിരുന്നു. കോസ്റ്റ് ഗാർഡിന്റെ ലൈഫ് ജാക്കറ്റും ഇതിലുണ്ട്.

വിവരമറിഞ്ഞ് ഹിൽപാലസ് പോലീസ് സ്ഥലത്തെത്തി. ജീപ്പിൽ നിന്ന് ഇറങ്ങിവന്ന അൽ ടികെ എന്ന സിവിൽ പോലീസ് ഓഫീസർ ദേശീയ പതാക കണ്ടതോടെ സല്യൂട്ട് അടിച്ച് ആദരിക്കുകയായിരുന്നു. തുടർന്ന് മാലിന്യത്തിൽ കിടന്ന പതാകകൾ ഓരോന്നായി അദ്ദേഹം മടക്കിയെടുത്തു. മറ്റാരെക്കൊണ്ടെങ്കിലും എടുപ്പിക്കാമെന്ന് അവിടെ നിന്ന നാട്ടുകാർ പറഞ്ഞെങ്കിലും പോലീസുകാരൻ അതൊന്നും വകവെച്ചില്ല. അത്രയും നേരം പതാകകൾ മാലിന്യത്തിൽ ഇടുന്നത് ശരിയല്ലെന്ന് പറഞ്ഞ അദ്ദേഹം ഓരോ പതാകയും വൃത്തിയായി മടക്കിയെടുത്തു. ഇത് ജീപ്പിലേക്ക് കൊണ്ടുപോയി വെച്ചു.

ദേശീയ പതാകയെ അപമാനിച്ചതിൽ ഹിൽ പാലസ് പോലീസ് കേസെടുത്ത് അന്വേഷണം ആരംഭിച്ചു. മാലിന്യം നീക്കാൻ ചുമതലപ്പെടുത്തിയവർ ചെയ്തതാകാം ഇത് എന്നാണ് നിഗമനം.