ഒരു ഞണ്ടിന്റെ ചിത്രമാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. തിരിച്ചും മറിച്ചും നോക്കി ചിത്രത്തെ വിലയിരുത്തുകയാണ് ഇന്റർനെറ്റ് ലോകം. കാരണം ഈ ഞണ്ടിന്റെ പല്ലുകൾ അൽപം സവിശേഷത നിറഞ്ഞതാണ്. മനുഷ്യരുടേതിന് സമാനമായ പല്ലുകൾ ഉള്ളതിനാലാണ് വെറുമൊരു ഞണ്ടിന്റെ ചിത്രം സോഷ്യൽമീഡിയ ഏറ്റെടുത്ത് തരംഗമാകാൻ ഇടയാക്കിയത്.
ഫെഡോർട്ട്സോവ് എന്നയാളുടെ ഇൻസ്റ്റഗ്രാമിൽ നിന്നാണ് അപൂർവ്വമായ ഈ ഞണ്ടിന്റെ ചിത്രം പോസ്റ്റ് ചെയ്തിരിക്കുന്നത്. ഒരാഴ്ച മുമ്പായിരുന്നു ഇൻസ്റ്റഗ്രാമിൽ ഈ പോസ്റ്റ് വന്നത്. എന്നാൽ ഞണ്ടിന്റെ പല്ല് ചർച്ചയായതോടെ ഇൻസ്റ്റഗ്രാമിൽ ചിത്രം വൈറലാകുകയായിരുന്നു.
മനുഷ്യർക്ക് പോലുമില്ല ഇത്ര മനോഹരമായ പല്ലെന്നാണ് ചിലരുടെ പ്രതികരണം. പല്ലുഡോക്ടർ ചില അറ്റകുറ്റപ്പണികൾ ചെയ്ത് ഞണ്ടിന്റെ പല്ല് മാറ്റിയെടുത്തുവെന്നാണ് മറ്റ് ചിലർ അഭിപ്രായപ്പെട്ടത്. ചിത്രം ഫോട്ടോഷോപ്പാണെന്ന സംശയവും പലരും പ്രകടിപ്പിച്ചു.
(Image: instagram.com/rfedortsov_official_account)
വൈറൽ ചിത്രം ആദ്യമായി പോസ്റ്റ് ചെയ്ത ഫെഡോർട്ട്സോവ് എന്നയാൾ പൊതുവെ സമുദ്ര ജീവികളുടെ വ്യത്യസ്തമായ ചിത്രങ്ങൾ പകർത്തി സോഷ്യൽമീഡിയയിൽ പങ്കുവെക്കാറുണ്ട്. എട്ടുകാലിയെ പോലെയിരിക്കുന്ന മത്സ്യത്തെയും മണ്ണിരയെ പോലെയുളള മീനിനെയും ബ്ലോബിനെ പോലെയിരിക്കുന്ന വിചിത്ര ജീവിയെയുമെല്ലാം അദ്ദേഹത്തിന്റെ പേജിൽ കാണാനാകും.
