പ്രചരിക്കുന്ന വാർത്തകളിൽ യാതൊരു സത്യവുമില്ലെന്ന് വെളിപ്പെടുത്തി നടി നിത്യാ മേനോൻ. താരത്തിന്റെ വിവാഹ വാർത്തകൾ പ്രചരിച്ചതിന് പിന്നാലെയാണ് പ്രതികരണം. മലയാളത്തിലെ പ്രമുഖ നടനുമായി നടി നിത്യാ മേനോന്റെ വിവാഹം നടക്കാൻ പോകുന്നുവെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്‌തോടെ മലയാള മാദ്ധ്യമങ്ങളിലും വാർത്ത കാട്ടുതീ പോലെ പടർന്നു. ഇതോടെയാണ് താരം പ്രതികരിച്ചത്.
ഇപ്പോൾ തന്നെക്കുറിച്ച് പ്രചരിക്കുന്ന വാർത്തകൾ വസ്തുതാ വിരുദ്ധമാണ്. ഇത്തരം വാർത്തകൾ പ്രചരിപ്പിക്കുന്നതിന് മുമ്പായി ലഭിച്ച വിവരം ശരിയാണോ എന്ന് പരിശോധിക്കാൻ എല്ലാവരും തയ്യാറായിരുന്നെങ്കിലെന്ന് ആഗ്രഹിക്കുകയാണെന്നും നിത്യ മേനോൻ പറഞ്ഞു. തെന്നിന്ത്യൻ താരമായ നിത്യ മേനോൻ വളരെ ചുരുക്കം ചിത്രങ്ങൾക്കൊണ്ട് മലയാളികൾക്ക് പ്രിയങ്കരിയായി മാറിയ നടിയാണ്. കന്നട, തെലുങ്ക്, തമിഴ്, ഹിന്ദി ചിത്രങ്ങളിലും നിത്യ ശ്രദ്ധേയമായ വേഷമണിഞ്ഞിട്ടുണ്ട്.
ബാലതാരമായി 1988ലാണ് നിത്യ സിനിമയിൽ ചുവടുവെപ്പ് നടത്തുന്നത്. ആകാശഗോപുരം എന്ന ചിത്രത്തിലൂടെ മലയാള സിനിമയിലെത്തിയ നടി കേരള കഫേ, എയ്ഞ്ചൽ ജോൺ, അപൂർവ്വ രാഗം, അൻവർ, ഉറുമി, തത്സമയം ഒരു പെൺകുട്ടി, ഉസ്താദ് ഹോട്ടൽ, ബാംഗ്ലൂർ ഡെയ്‌സ് തുടങ്ങി നിരവധി ചിത്രങ്ങളിലൂടെ പ്രേക്ഷകർക്ക് മുമ്പിലെത്തിയിട്ടുണ്ട്. പിന്നണി ഗായിക കൂടിയാണ് നടി.
Comments