ആരാണ് ബംഗാൾ മന്ത്രി പാർത്ഥയുടെ പ്രിയ സുഹൃത്ത് അർപ്പിത മുഖർജി?ഇഡി പിടിച്ചെടുത്ത് 21 കോടിയും 20 ഫോണുകളും വജ്രാഭരണങ്ങളും; ബംഗാളിൽ തൃണമൂൽ വിയർക്കുന്നു

കൊൽക്കത്ത: അദ്ധ്യാപക നിയമന അഴിമതിയുമായി ബന്ധപ്പെട്ട് പശ്ചിമബംഗാൾ വ്യവസായ മന്ത്രി പാർത്ഥ ചാറ്റർജി ഇഡി അറസ്റ്റിലായതോടെ കൂടെ പിടിയിലായ പ്രിയ സുഹൃത്ത് അർപ്പിത മുഖർജി ആരാണെന്നാണ് ചോദ്യങ്ങൾ ഉയരുന്നത്. മന്ത്രിയും കൂട്ടാളി അർപ്പിതയും അറസ്റ്റിലായതോടെ ബംഗാളിൽ രാഷ്‌ട്രീയ വിവാദങ്ങൾ ആരംഭിച്ചിരിക്കുകയാണ്.

മുതിർന്ന തൃണമൂൽ കോൺഗ്രസ് നേതാവും മമതയുടെ വിശ്വസ്തനുമായ പാർത്ഥ ചാറ്റർജിയുടെ പെൺസുഹൃത്തും നടിയുമാണ് അർപ്പിത മുഖർജി. ബംഗാൾ,ഒഡീഷ,തമിഴ്, സിനിമകളിൽ ചെറിയ വേഷങ്ങളിൽ മാത്രം അഭിനയിച്ച അർപ്പിതയുടെ ആഡംബരജീവിതമാണ് ഇപ്പോൾ ചർച്ചയാകുന്നത്. വിലകൂടിയ വസ്ത്രങ്ങളും മേക്കപ്പും ധരിച്ച് മാത്രം പൊതു ഇടങ്ങളിൽ പ്രത്യക്ഷപ്പെടാറുള്ള അർപ്പിതയുടെ വീട്ടിൽ 7 ലധികം ആഡംബര കാറുകൾ കണ്ടിട്ടുണ്ടെന്നാണ് പ്രദേശവാസികൾ പറയുന്നത്.

2019ലും 2020-ലും പാർത്ഥ ചാറ്റർജിയുടെ ദുർഗ്ഗാ പൂജാ കമ്മറ്റിയുടെ നക്തല ഉദയൻ സംഘത്തിന്റെ പ്രമോഷണൽ കാമ്പയിനുകളുടെ പ്രധാനിയായിരുന്ന അർപ്പിതയുടെ വസതിയിലെ സ്ഥിരം സന്ദർശകനായിരുന്നു പാർത്ഥ ചാറ്റർജി.

ഇന്നലെ നടന്ന ഇഡി റെയ്ഡിൽ 21 കോടി രൂപ, വിദേശ കറസികൾ, ലക്ഷക്കണക്കിന് രൂപ വരുന്ന വജ്രാഭരണങ്ങൾ, സ്വർണം,ഇലക്ട്രോണിക് ഉപകരണങ്ങൾ എന്നിവ കണ്ടെടുത്തിരുന്നു. ഇത്രയധികം ഫോമുകൾ കൈവശം വെച്ചതിന്റെ കാരണമടക്കം ഇഡി അന്വേഷിക്കുന്നുണ്ട്. ഇന്നലെ നടന്ന റെയ്ഡിനൊടുവിലാണ് പാർത്ഥ ചാറ്റർജിയെയും അർപ്പിതയെയും അറസ്റ്റ് ചെയ്തത്. 23 മണിക്കൂറിലേറെ സമയം പാർത്ഥയെ ചോദ്യം ചെയ്തിരുന്നു.