ന്യൂഡൽഹി: മങ്കിപോക്സിനെതിരെ പ്രതിരോധ വാക്സിൻ നിർമ്മിക്കാനുള്ള നീക്കങ്ങൾ ആരംഭിച്ച് കേന്ദ്രസർക്കാർ. ഇതിനായി സർക്കാർ നിർമ്മാതാക്കളിൽ നിന്നും താൽപര്യപത്രം ക്ഷണിച്ചു. രാജ്യത്ത് കൂടുതൽ പേരിൽ മങ്കിപോക്സിന്റെ ലക്ഷണങ്ങൾ കണ്ടുവരുന്ന പശ്ചാത്തലത്തിലാണ് കേന്ദ്രസർക്കാരിന്റെ അടിയന്തിര നീക്കം.
മികച്ച പരിചയ സമ്പന്നരായ വാക്സിൻ നിർമ്മാതാക്കളിൽ നിന്നാണ് അപേക്ഷ ക്ഷണിച്ചത്. ഇതിന് പുറമേ ഇൻ വിട്രോ ഡയഗ്നോസ്റ്റിക് കിറ്റ് നിർമ്മാണത്തിനായും താൽപര്യപത്രം ക്ഷണിച്ചിട്ടുണ്ട്. താത്പര്യമുള്ള വാക്സിൻ നിർമ്മാതാക്കൾ അടുത്ത മാസം 10 നുള്ളിൽ താത്പര്യപത്രം സമർപ്പിക്കണം എന്നാണ് കേന്ദ്രസർക്കാരിന്റെ നിർദ്ദേശം.
രാജ്യത്ത് ഇതുവരെ നാല് പേർക്കാണ് മങ്കിപോക്സ് സ്ഥിരീകരിച്ചത്. കേരളത്തിൽ നിന്നുള്ള മൂന്ന് പേർക്കും, ഡൽഹി സ്വദേശിയ്ക്കുമാണ് നിലവിൽ രോഗബാധ കണ്ടെത്തിയിരിക്കുന്നത്. ഇതിന് പുറമേ നിരവധി പേർ രോഗ ലക്ഷണങ്ങളുമായി വിവിധ ആശുപത്രികളിൽ ചികിത്സ തേടുന്നുണ്ട്. ഈ സാഹചര്യത്തിലാണ് വാക്സിൻ നിർമ്മിക്കാൻ കേന്ദ്രസർക്കാർ തീരുമാനിച്ചത്.
