ന്യൂഡല്‍ഹി: രാഷ്‌ട്രപതി ദ്രൗപദി മുര്‍മുവിനെ അപമാനിച്ച് കോണ്‍ഗ്രസ്. രാഷ്ട്രപതിയെ ‘രാഷ്‌ട്രപത്‌നി’യെന്ന് വിളിച്ചാണ് കോണ്‍ഗ്രസ് നേതാവ് അധീര്‍ രഞ്ജന്‍ ചൗധരി അപമാനിച്ചത്. ഇതിനെതിരെ രൂക്ഷ വിമര്‍ശനവുമായി ബിജെപി രംഗത്തെത്തി. സ്മൃതി ഇറാനിയുടെ നേതൃത്വത്തില്‍ ലോക്‌സഭയില്‍ ശക്തമായ പ്രതിഷേധമാണ് ബിജെപി നടത്തുന്നത്.
ലോക്‌സഭയില്‍ സംസാരിക്കുന്നതിനിടെയാണ് രാഷ്ട്രപതിയെ രാഷ്ട്രപത്നിയെന്ന് അധീര്‍ രഞ്ജന്‍ ചൗധരി വിളിച്ചത്. ഈ വിഷയം രാജ്യസഭയിലും ലോക്‌സഭയിലും ഉയര്‍ത്തി ശക്തമായ പ്രതിഷേധമാണ് ബിജെപി നടത്തുന്നത്. രാജ്യസഭയില്‍ നിര്‍മ്മല സീതാരാമനും, ലോക്‌സഭയില്‍ സ്മൃതി ഇറാനിയുമാണ് വിഷയം ഉയര്‍ത്തി പ്രതിഷേധിക്കുന്നത്.
കോണ്‍ഗ്രസ് അധിക്ഷേപം ചൂണ്ടിക്കാട്ടി ബിജെപിയുടെ വനിതാ എംപിമാര്‍ ഇന്ന് രാവിലെ പാര്‍ലമെന്റ് വളപ്പില്‍ പ്രതിഷേധ പ്രകടനം നടത്തിയിരുന്നു. വിഷയമുന്നയിച്ച് സ്മൃതി ഇറാനി പത്ര സമ്മേളനവും നടത്തിയിരുന്നു.അധിക്ഷേപ പരാമര്‍ശത്തില്‍ സോണിയ ഗാന്ധി മാപ്പ് പറയണം എന്നാവശ്യപ്പെട്ട് രണ്ട് സഭകളിലും ബിജെപി ശക്തമായ പ്രതിഷേധമാണ് ഉയര്‍ത്തുന്നത്. എന്നാല്‍ തനിക്ക് അബദ്ധം പറ്റിയതാണെന്നും, മാപ്പ് പറയാനില്ലെന്നുമാണ് അധീര്‍ രഞ്ജര്‍ ചൗധരിയുടെ നിലപാട്.
നേരത്തെ ദ്രൗപദി മുര്‍മുവിനെ പാവ എന്നു വിളിച്ചും കോണ്‍ഗ്രസ് അധിക്ഷേപിച്ചിരുന്നു. ഇതിന് പിന്നാലെയാണ് വീണ്ടും രാഷ്ട്രപതിയെ അപമാനിക്കാനുള്ള കോണ്‍ഗ്രസ് നീക്കം. നിലവില്‍ ലോക്‌സഭ 12 മണി വരെ നിര്‍ത്തി വച്ചിരിക്കുകയാണ്.
Comments