യുവാവിന്റെ വയറ്റിൽ 50 നാണയങ്ങൾ; പരിശോധിച്ച ഡോക്ടർമാർ വരെ ഞെട്ടി; പുറത്തെടുത്തത് ശസ്ത്രക്രിയയില്ലാതെ

ജയ്പൂർ : യുവാവിന്റെ വയറ്റിൽ നിന്ന് ഡോക്ടർമാർ നീക്കം ചെയ്തത് 50 നാണയങ്ങൾ. രാജസ്ഥാനിലെ ജോധ്പൂരിലാണ് സംഭവം. കടുത്ത വയറു വേദനെ തുടർച്ച് ആശുപത്രിയിലെത്തിയ ആളുടെ എൻഡോസ്‌കോപി റിപ്പോർട്ട് കണ്ട് ഡോക്ടർമാർ പോലും ഞെട്ടി. തുടർന്ന് ശസ്ത്രക്രിയ ഇല്ലാതെയാണ് നാണയങ്ങൾ പുറത്തെടുത്തത്.

മഥുരദാസ് മാത്തൂർ എന്ന 40 കാരനാണ് നാണയങ്ങൾ വിഴുങ്ങിയത്. മാനസിക വിഭ്രാന്തി കാരണമാണ് ഇയാൾ നാണയങ്ങൾ വിഴുങ്ങുന്നത് എന്ന് കുടുംബം പറഞ്ഞു. എൻഡോസ്‌കോപിയിലൂടെ നാണയങ്ങൾ വയറ്റിലുണ്ടെന്ന് തെളിഞ്ഞതോടെ ശസ്ത്രക്രിയ നടത്താതെ തന്നെ ഇത് പുറത്തെടുക്കാൻ തീരുമാനിക്കുകയായിരുന്നു.

ഒരേ സമയം ഒന്നോ രണ്ടോ നാണയങ്ങൾ മാത്രമേ മനുഷ്യന്റെ അന്നനാളത്തിലൂടെ പുറത്തെടുക്കാനാകൂ. അതിനാൽ ഇത് പ്രാവർത്തികമാക്കാൻ ഏറെ വെല്ലുവിളികൾ നേരിടേണ്ടി വന്നു. രണ്ട് ദിവസമെടുത്താണ് ഇത്രയും നാണയങ്ങൾ പുറത്തെടുത്തത് എന്ന് ഡോക്ടർമാർ പറയുന്നു.

സാധാരണയായി കുട്ടികളിലാണ് ഇത്തരം പ്രശ്‌നങ്ങൾ കണ്ടുവരുന്നത്. എന്നാൽ മുതിർന്ന ഒരാളുടെ വയറ്റിൽ നിന്നും ഇത്രയധികം നാണയങ്ങൾ പുറത്തെടുക്കുന്നത് ആദ്യമായാണെന്ന് വിദഗ്ധർ പറയുന്നു. ഇയാളെ മാനസികാരോഗ്യ വിദഗ്ധനെ കാണിക്കാനും നിർദ്ദേശം നൽകി.