ഇടുക്കി ഡാമിന്റെ അഞ്ച് ഷട്ടറുകളും ഉയർത്തി; പെരിയാറിന്റെ തീരത്തുള്ളവർക്ക് ജാഗ്രതാ നിർദേശം

ഇടുക്കി; നേരത്തെ മുന്നറിയിപ്പ് നൽകിയിരുന്നത് പ്രകാരം ഇടുക്കി ചെറുതോണി അണക്കെട്ടിന്റെ അഞ്ച് ഷട്ടറുകളും ഉയർത്തി. സെക്കന്റിൽ 2.6 ലക്ഷം ലിറ്റർ വെള്ളമാണ് ഡാമിൽ നിന്ന് പുറത്തേക്ക് ഒഴുകുന്നത്. വൈകിട്ട് അഞ്ച് മണിയോടെ മൂന്ന് ലക്ഷം ലിറ്റർ വെള്ളം തുറന്ന് വിടും.

നേരത്തെ മൂന്ന് ഷട്ടറുകളായിരുന്നു ഉയർത്തിയത്. എന്നാൽ വൃഷ്ടി പ്രദേശത്ത് മഴ തുടരുന്നതിനാലും മുല്ലപ്പെരിയാർ അണക്കെട്ടിലെ സ്പിൽവേയിലൂടെ ഒഴുക്കുന്ന ജലത്തിന്റെ തോത് വർധിപ്പിച്ചതിനാലുമാണ് ജലനിരപ്പ് നിയന്ത്രിക്കാൻ 5 ഷട്ടറുകളും ഉയർത്തിയത്. പെരിയാറിന്റെ തീരത്ത് താമസിക്കുന്നവർ ജാഗ്രത പാലിക്കണമെന്നാണ് നിർദേശം. ജലനിരപ്പ് നിയന്ത്രിക്കാനായില്ലെങ്കിൽ നാളെ കൂടുതൽ വെള്ളം പുറത്തേക്ക് ഒഴുക്കും. 2018ന് ശേഷം ഇതാദ്യമായാണ് ഇടുക്കി ചെറുതോണി അണക്കെട്ടിന്റെ മുഴുവൻ ഷട്ടറുകളും ഉയർത്തുന്നത്.

അതേസമയം മലമ്പുഴ ഡാമിന്റെ തുറന്ന ഷട്ടറുകൾ കൂടുതൽ ഉയർത്തിയതായി അധികൃതർ അറിയിച്ചു. കാഞ്ഞിരപ്പുഴ ഡാമിലെ ഷട്ടറുകളും കൂടുതലായി ഉയർത്തും. മാട്ടുപ്പെട്ടി ഡാമിന്റെ ഷട്ടറുകളും പമ്പ അണക്കെട്ടിന്റെ ഷട്ടറുകളും വൈകിട്ട് തുറക്കുമെന്ന് അധികൃതർ വ്യക്തമാക്കി.