ഗാന്ധിജിയുടെ സ്വപ്നസാഫല്യത്തിനായി സ്വയം സമർപ്പിക്കുന്നു; ജനങ്ങളുടെ ആഗ്രഹത്തെ സഫലീകരിക്കുന്ന സർക്കാരാണ് വേണ്ടതെന്ന് പ്രധാനമന്ത്രി

ന്യൂഡൽഹി: മഹാത്മാ ഗാന്ധിയുടെ സ്വപ്‌ന സാക്ഷാത്ക്കാരത്തിനായി തന്നെ സ്വയം സമർപ്പിച്ചെന്ന് പ്രധാനമന്ത്രി നരേന്ദ്രമോദി. അവസാനത്തെ വ്യക്തിയെയും പരിപാലിക്കുക എന്ന മഹാത്മാ ഗാന്ധിയുടെ സ്വപ്നം, അവസാനത്തെ ആളെയും കഴിവുള്ളവരാക്കാനുള്ള അദ്ദേഹത്തിന്റെ ആഗ്രഹം, അതിനായി സ്വയം സമർപ്പിച്ചുവെന്നായിരുന്നു പ്രധാനമന്ത്രി പറഞ്ഞത്.

സ്വാതന്ത്ര്യാനന്തര ഭാരതത്തിൽ ജനിച്ച ആദ്യ പ്രധാനമന്ത്രിയാണ് താനാണ്. ചെങ്കോട്ടയിൽ നിന്ന് ഈ രാജ്യത്തെ പൗരന്മാരെ സ്തുതിക്കാൻ അവസരം ലഭിച്ച വ്യക്തിയാണ്. ഈ എട്ട് വർഷത്തിൽ ജനങ്ങളിൽ നിന്ന് ഒരുപാട് കാര്യങ്ങൾ പഠിക്കാൻ സാധിച്ചെന്ന് അദ്ദേഹം പറഞ്ഞു. എട്ട് വർഷത്തെ അനുഭവങ്ങളുടെയും പ്രവർത്തനങ്ങളുടെയും ഫലമായി മാറ്റങ്ങൾ കാണാനുണ്ടെന്ന് പ്രധാനമന്ത്രി കൂട്ടിച്ചേർത്തു.

നാം സ്വാതന്ത്ര്യം നേടിയപ്പോൾ നമ്മുടെ വികസന പാതയെ സംശയിക്കുന്ന നിരവധി സന്ദേഹവാദികൾ ഉണ്ടായിരുന്നു. പക്ഷേ, ഈ നാട്ടിലെ ജനങ്ങളുടെ കാര്യത്തിൽ വ്യത്യസ്തമായ എന്തെങ്കിലും ഉണ്ടെന്ന് അവർക്കറിയില്ലായിരുന്നു. ഈ മണ്ണ് പ്രത്യേകതയുള്ളതാണെന്ന് അവർക്കറിയില്ലെന്ന് പ്രധാനമന്ത്രി പറഞ്ഞു.

ഇന്ത്യയിലെ ജനങ്ങൾ നല്ല മാറ്റങ്ങൾ ആഗ്രഹിക്കുന്നു, അതിലേക്ക് സംഭാവന നൽകാനും ആഗ്രഹിക്കുന്നു. ഓരോ സർക്കാരും ജനങ്ങളുടെ ഈ ആഗ്രഹത്തെ സഫലീകരിക്കണമെന്ന് പ്രധാനമന്ത്രി കൂട്ടിച്ചേർത്തു.