ദൃശ്യം 3; ജോർജ്ജ് കുട്ടി വീണ്ടും എത്തുന്നു?; പുതിയ ചിത്രം ഉടൻ പ്രഖ്യാപിക്കുമെന്ന് ആന്റണി പെരുമ്പാവൂർ- ‘Drishyam 3’

മലയാള സിനിമാ മേഖലയെ തന്നെ അതിശയിപ്പിച്ച ചിത്രങ്ങളിൽ ഒന്നാണ് ദൃശ്യം. ആരാധകരെ ആവേശത്തിലാക്കി മോഹൻ ലാലും സംവിധായകൻ ജിത്തു ജോസഫും ഒന്നിച്ചപ്പോൾ വെളളിത്തിരയിൽ കണ്ടത് ആരെയും അതിശയിപ്പിക്കുന്ന കഥാമുഹൂർത്തങ്ങളാണ്. ഒന്നാം ഭാഗത്തിന് പിന്നാലെ രണ്ടാം ഭാഗവും ഇരുകയ്യും നീട്ടിയാണ് പ്രേക്ഷകർ സ്വീകരിച്ചത്. ഇതിനിടയിൽ ദൃശ്യത്തിന്റെ മൂന്നാം ഭാഗം വരുന്നു എന്ന പ്രചാരണങ്ങളും വ്യാപകമായിരുന്നു. രണ്ടാം ഭാഗത്തിന്റെ ക്ലൈമാക്‌സ് ഇതാണോ ചൂണ്ടിക്കാണിക്കുന്നത് എന്ന സംശയം പലരും ഉയർത്തിയിരുന്നു.

ഇപ്പോൾ സമൂഹ മാദ്ധ്യമത്തിൽ പ്രചരിക്കുന്നത് ദൃശ്യം 3 യുടെ ഫാൻ മെയിഡ് പോസ്റ്ററാണ്. കൂടാതെ ദൃശ്യം 3 എന്ന ഹാഷ് ടാഗ് ട്വിറ്ററിൽ ടോപ്പ് ട്രെൻഡിംഗ് ആയിരിക്കുകയാണ്. മുമ്പ് മൂന്നാം ഭാഗം ഉണ്ടാകും എന്ന് സംബന്ധിച്ച കാര്യങ്ങൾ സംവിധായകൻ തന്നെ പുറത്ത് വിട്ടിരുന്നു. ഇതോടെയാണ് പ്രചാരണങ്ങൾ ആരാധകർ ഏറ്റെടുത്തത്.

മൂന്നാം ഭാഗത്തിന്റെ പ്രഖ്യാപനത്തിനായി കാത്തിരിക്കുകയാണ് ആരാധകർ. ഇവക്കെല്ലാം പിന്നാലെ ആന്റണി പെരുമ്പാവൂരിന്റെ നിർമ്മാണത്തിൽ ഒരുങ്ങുന്ന പുതിയ ചിത്രത്തിന്റെ പ്രഖ്യാപനം ഉടൻ ഉണ്ടാകുമെന്ന റിപ്പോർട്ടുകൾ പുറത്ത് വന്നിരുന്നു.ആഗസ്റ്റ് 17ന് പുതിയ ചിത്രത്തിന്റെ പ്രഖ്യാപനം ഉണ്ടാകുമെന്നാണ് ആന്റണി പെരുമ്പാവൂർ തന്റെ ട്വിറ്ററിലൂടെ അറിയിച്ചിട്ടുള്ളത്. ദൃശ്യത്തിന്റെ നിർമ്മാതാവിൽ നിന്ന് തന്നെ അറിയിപ്പ് വന്നതൊടെ ദൃശ്യം 3 തന്നെയാകും വരുന്നതെന്ന പ്രതീക്ഷയിലാണ് ആരാധകർ.