തൃശൂർ: കോഴി നമുക്ക് മുട്ട തരും, പശു നമുക്ക് പാൽ തരും എന്നെല്ലാം ചെറിയ ക്ലാസിൽ പഠിച്ചതോർമ്മയില്ലേ. നേരം വെളുത്താൽ കൂവി എഴുന്നേൽപ്പിക്കുന്ന പൂവൻകോഴിയും മുട്ടതരുന്ന പിടക്കോഴിയും വീടുകളിലെ നിത്യകാഴ്ചയായിരുന്നു.
എന്നാൽ തൃശൂർ ചേലക്കര പങ്ങാരപ്പിള്ളി പ്ലാപ്പിള്ളി സാറാ കുട്ടിയുടെ വീട്ടിലെ കോഴി അൽപ്പം വ്യത്യസ്തയാണ്. ആദ്യം മുട്ടയിട്ട് കൊണ്ടിരുന്ന പിടക്കോഴിയിപ്പോൾ ആളാകെ മാറി പൂവൻകോഴിയായി മാറിയിരിക്കുകയാണ്. ചേലക്കര ഗ്രാമപഞ്ചായത്തിൽ നിന്നും രണ്ട് വർഷം മുൻപ് ലഭിച്ച കോഴികളിലൊന്നാണ് മുട്ടയിട്ട് തുടങ്ങിയ ശേഷം പൂവൻ കോഴിയുടെ എല്ലാ ലക്ഷണങ്ങളും കാണിക്കുന്നത്.
പുലർച്ചെ കൂവാൻ തുടങ്ങിയതോടെയാണ് വീട്ടുകാരുടെ ശ്രദ്ധയിൽ പെടുന്നത്. പിന്നീട് രൂപമാറ്റവും മറ്റു ലക്ഷണങ്ങളും കണ്ടു തുടങ്ങുകയായിരുന്നു. കോഴിയിൽ ഉണ്ടായ ഈ അപൂർവ്വ മാറ്റം കൗതുകവും കുറച്ച് ആശങ്കയുണ്ടാക്കുന്നതാണെന്നും സാറാ കുട്ടി പറയുന്നു. എന്തായാലും കൂവുന്ന പിടയെ കാണാൻ നിരവധി ആളുകളാണ് സാറാകുട്ടിയുടെ വീട്ടിലേക്കെത്തുന്നത്.
Comments