ഝാർഖണ്ഡ് മുഖ്യമന്ത്രി ഹേമന്ത് സോറൻ അനധികൃത ഖനനവുമായി ബന്ധപ്പെട്ട കേസിൽ അയോഗ്യത നേരിടുമെന്ന അഭ്യൂഹങ്ങൾക്കിടെ അദ്ദേഹത്തിന്റെ സഹോദരനും എംഎൽഎയുമായ ബസന്ത് സോറൻ ഡൽഹിയലെത്തി. മൂന്ന് ദിവസമായി ഡൽഹിയിൽ ക്യാമ്പ് ചെയ്യുന്ന ബസന്ത് ബിജെപിയുടെ ഉന്നത നേതാക്കളുമായി കൂടിക്കാഴ്ച നടത്തിയതായി ദേശീയ മാദ്ധ്യമങ്ങൾ റിപ്പോർട്ട് ചെയ്തു.
തിരഞ്ഞെടുപ്പ് ചട്ടങ്ങൾ ലംഘിച്ചതിന് മുഖ്യമന്ത്രി ഹേമന്ത് സോറനെ എംഎൽഎ സ്ഥാനത്ത് നിന്ന് അയോഗ്യനാക്കണമെന്ന് കേന്ദ്ര തിരഞ്ഞെടുപ്പ് കമ്മീഷൻ ഝാർഖണ്ഡ് ഗവർണർ രമേഷ് ബെയ്സിനോട് ആവശ്യപ്പെട്ടതായി വാർത്തകൾ പുറത്ത് വന്നിരുന്നു. സംസ്ഥാനത്ത് അതിവേഗം മാറിക്കൊണ്ടിരിക്കുന്ന രാഷ്‌ട്രീയ സാഹചര്യങ്ങൾക്കിടയിൽ സോറന്റെ എംഎൽഎ സ്ഥാനം അയോഗ്യനാക്കുന്നതിനെക്കുറിച്ചുള്ള തിരഞ്ഞെടുപ്പ് കമ്മീഷന്റെ നിലപാടിനെ കുറിച്ച് ഗവർണർ ബെയ്സിന്റെ നടപടി ഉടനുണ്ടാകും. സർക്കാർ കരാറുകൾക്കുള്ള അയോഗ്യത സംബന്ധിച്ച 1951ലെ ജനപ്രാതിനിധ്യ നിയമത്തിലെ 9(എ) വകുപ്പ് ലംഘിച്ചതിന് സോറനെ അയോഗ്യനാക്കണമെന്ന് കേസിലെ ഹരജിക്കാർ ആവശ്യപ്പെട്ടിരുന്നു.
Comments