ന്യൂഡൽഹി: നിയുക്ത ബ്രിട്ടൺ പ്രധാനമന്ത്രി ലിസ് ട്രസിന് അഭിനന്ദനങ്ങൾ നേർന്ന് പ്രധാനമന്ത്രി നരേന്ദ്ര മോദി. ലിസ് ട്രസിന്റെ നേതൃത്വത്തിൽ ഇന്ത്യയും ബ്രിട്ടണും തമ്മിലുള്ള ബന്ധം കൂടുതൽ ശക്തിപ്പെടുമെന്ന് പ്രതീക്ഷിക്കുന്നതായി നരേന്ദ്രമോദി പറഞ്ഞു. തിരഞ്ഞെടുപ്പ് ഫലം പുറത്തുവന്നതിന് പിന്നാലെ ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
ബ്രിട്ടന്റെ പുതിയ പ്രധാനമന്ത്രിയായി തിരഞ്ഞെടുക്കപ്പെട്ട ലിസ് ട്രസിന് അഭിനന്ദനങ്ങൾ. താങ്കളുടെ നേതൃത്വത്തിൽ ഇന്ത്യയും ബ്രിട്ടനും തമ്മിലുള്ള നിർണായകവും, തന്ത്രപ്രധാനവുമായ പങ്കാളിത്തം കൂടുതൽ ശക്തിപ്പെടുമെന്നാണ് പ്രതീക്ഷിക്കുന്നത്. പുതിയ ചുമതലയും ഉത്തരവാദിത്വങ്ങളും ഭംഗിയായി നിറവേറ്റാൻ കഴിയട്ടെയെന്നും പ്രധാനമന്ത്രി ട്വീറ്റ് ചെയ്തു.
വൈകീട്ടോടെയായിരുന്നു ബ്രിട്ടൻ പ്രധാനമന്ത്രി പദത്തിലേക്ക് നടന്ന തിരഞ്ഞെടുപ്പിന്റെ ഫലം പുറത്തുവന്നത്. ഇന്ത്യൻ വംശജൻ ഋഷി സുനകിനെ പരാജയപ്പെടുത്തിയായിരുന്നു ലിസ് ട്രസ് പ്രധാനമന്ത്രി പദം അലങ്കരിച്ചത്. 81,326 വോട്ടായിരുന്നു ലിസ് ട്രസിന് ലഭിച്ചത്. ചൊവ്വാഴ്ച പ്രധാനമന്ത്രിയായി ലിസ് ട്രസ് സത്യപ്രതിജ്ഞ ചെയ്യും.
Comments