കൊല്ലം: അക്രമകാരികളായ തെരുവ് നായക്കളെ കൊന്നൊടുക്കണമെന്ന് ആവശ്യം. തെരുവ് നായ്ക്കളെ കൊല്ലുന്നതിന് അനുമതി തേടി കൊല്ലം ജില്ലാ പഞ്ചായത്ത് ഹൈക്കോടതിയെ സമീപിച്ചു. പഞ്ചായത്തിൽ തെരുവ് നായ ശല്യം രൂക്ഷമായ പശ്ചാത്തലത്തിൽ മുൻ കരുതൽ നടപടിയുടെ ഭാഗവുമായിട്ടാണ് തെരുവ് നായ്ക്കളെ കൊന്നൊടുക്കാൻ അനുവാദം തേടിയിരിക്കുന്നത്.
വന്ധ്യംകരിച്ച തെരുവുനായ്ക്കളെ സംരക്ഷിക്കാൻ പ്രത്യേക കേന്ദ്രം ജില്ലാ പഞ്ചായത്ത് ഒരുക്കും. കുരുയോട്ടുമലയിലെ ഒന്നര ഏക്കർ ഭൂമിയിലാണ് സംരക്ഷണ കേന്ദ്രം ഒരുക്കുക എന്ന് കൊല്ലം പഞ്ചായത്ത് പ്രസിഡന്റ് സാം കെ ഡാനിയൽ പറഞ്ഞു. സർക്കാർ കഴിഞ്ഞ ദിവസം പ്രഖ്യാപിച്ച വന്ധ്യംകരണത്തിനുള്ള ആദ്യ കേന്ദ്രം നാളെ കൊട്ടിയത്ത് പ്രവർത്തനം ആരംഭിക്കും.
അതേസമയം, സംസ്ഥാനത്ത് തെരുവ് നായ ശല്യം രൂക്ഷമാകുന്ന സാഹചര്യത്തിൽ പ്രതിരോധപ്രവർത്തനങ്ങൾ ആരംഭിക്കാൻ ഒരുങ്ങുകയാണ് മൃഗസംരക്ഷണ വകുപ്പ്. ഇതിന് മുന്നോടിയായി ഇന്ന് വകുപ്പ് യോഗം ചേരും. മന്ത്രി ചിഞ്ചു റാണിയുടെ അദ്ധ്യക്ഷതയിലാകും യോഗം ചേർന്ന് പ്രതിരോധ പ്രവർത്തനങ്ങൾ വിലയിരുത്തുക. വാക്സിൻ സംഭരണം, ജീവനക്കാരുടെ വിന്യാസം, അനുബന്ധ സൗകര്യങ്ങൾ എന്നിവയാകും പ്രധാനമായും യോഗത്തിൽ ചർച്ച ചെയ്യുക.
