ഇന്ത്യയിൽ മാത്രമല്ല, അങ്ങ് ബം​ഗ്ലാദേശിലുമുണ്ട് അപ്പാച്ചെയ്‌ക്ക് പിടി; ടിവിഎസ് അപ്പാച്ചെ RTR 160 2V ഇനി ബംഗ്ലാദേശിലും-Apache RTR 160 2V, TVS , Bangladesh

തമിഴ്‌നാട്ടിലെ ചെന്നൈ ആസ്ഥാനമായി പ്രവർത്തിക്കുന്ന ഇന്ത്യൻ മൾട്ടിനാഷണൽ മോട്ടോർസൈക്കിൾ നിർമ്മാതാക്കളാണ് ടിവിഎസ് മോട്ടോർ കമ്പനി. ടിവിഎസ് കമ്പനിയെ സംബന്ധിച്ചിടത്തോളം ഒരു പ്രധാന വാർത്തയാണ് കമ്പനി പുറത്തു വിട്ടിരിക്കുന്നത്. ടിവിഎസ് മോട്ടോർ കമ്പനി അവരുടെ അപ്പാച്ചെ RTR 160 2V ബംഗ്ലാദേശിൽ അവതരിപ്പിച്ചിരിക്കുകയാണ്. വർഷങ്ങളായി ഇന്ത്യൻ വിപണിയിൽ മിന്നിത്തിളങ്ങുന്ന ബൈക്കാണ് ടിവിഎസ് അപ്പാച്ചെ. ഇതിന് മുമ്പും ടിവിഎസ് തങ്ങളുടെ ബൈക്ക് ബംഗ്ലാദേശിൽ പുറത്തിക്കിയിരുന്നു. ടിവിഎസിന്റെ റൈഡർ 125 ആയിരുന്നു അപ്പാച്ചെയ്‌ക്ക് മുമ്പ് ബംഗ്ലാദേശ് വിപണിയിൽ കമ്പനി പുറത്തിറക്കിയ വാഹനം. മാറ്റങ്ങളൊന്നും വരുത്താതെ തന്നെയാണ് ആർടിആർ RTR 160 2V ബംഗ്ലാദേശിൽ കമ്പനി അവതരിപ്പിച്ചിരിക്കുന്നത്.

156.7 സിസി, 4-സ്‌ട്രോക്ക്, സിംഗിൾ സിലിണ്ടർ എയർ-കൂൾഡ് ബൈക്കാണ് അപ്പാച്ചെ RTR 160 2V. എഞ്ചിൻ 8000 ആർപിഎമ്മിൽ 14.14 പിഎസ് പരമാവധി കരുത്തും 6750 ആർപിഎമ്മിൽ 13.03 എൻഎം ടോർക്കും ഉത്പാദിപ്പിക്കുന്നു. 5 സ്പീഡ് ഗിയർ ബോക്‌സാണ് വാഹനത്തിന് നൽകിയിരിക്കുന്നത്. മണിക്കൂറിൽ 110 കിലോമീറ്റർ വേഗത കൈവരിക്കാൻ അപ്പാച്ചെ RTR 160 2V- ന് സാധിക്കും.

അപ്പാച്ചെ RTR 160 2V-ന് ജിജിടി( ഗ്ലൈഡ് ത്രൂ ടെക്‌നോളജി) നൽകിയിരിക്കുന്നതിനാൽ വാഹനം ട്രാഫിക്കിൽ ഓടുമ്പോൾ ഇസിയു(എൻജിൻ കൺട്രോൾ യൂണിറ്റ്) സ്വയമേ റിവേഴ്‌സ് വർദ്ധിപ്പിക്കുന്നു. ഇത് ട്രാഫിക്കിൽ കിടക്കുമ്പോൾ എഞ്ചിൻ ഓഫ് ആകാനുള്ള സാധ്യത കുറയ്‌ക്കും. കൂടാതെ മുൻ ചക്രം ലോക്ക് ആകുന്നത് തടയുന്ന സിംഗിൾ-ചാനൽ ആന്റി ലോക്ക് ബ്രേക്കിംഗ് സിസ്റ്റവും അപ്പാച്ചെ RTR 160 2V-ന് കമ്പനി നൽകിയിട്ടുണ്ട്.