കൊച്ചി : സംസ്ഥാനത്ത് പോപ്പുലർ ഫ്രണ്ട് നടത്തിയ അഴിഞ്ഞാട്ടത്തിനെതിരെ രൂക്ഷവിമർശനവുമായി ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ. കേരളം ഇന്നേ വരെ കണ്ടിട്ടില്ലാത്ത വ്യാപക അക്രമമാണ് ഇന്ന് പോപ്പുലർ ഫ്രണ്ടുകാർ നടത്തിയത് എന്ന് സുരേന്ദ്രൻ പറഞ്ഞു.
ആംബുലൻസ് പോലും ആക്രമിക്കപ്പെട്ടു, പോലീസിനെ വണ്ടിയിടിപ്പിച്ചു, ബസുകൾ കല്ലെറിഞ്ഞ് തകർത്തു, ഇതിനെല്ലാം പിന്നിൽ സർക്കാരിന്റെ പിടിപ്പുകേടാണെന്ന് അദ്ദേഹം പറഞ്ഞു. അക്രമങ്ങൾ നടന്നപ്പോൾ പോലീസ് കയ്യും കെട്ടി നോക്കിനിൽക്കുകയായിരുന്നു.
സർക്കാറിന്റെയും പോലീസിന്റെയും മൗനാനുവാദത്തോടെയാണ് സംസ്ഥാന വ്യാപകമായി അക്രമങ്ങൾ അരങ്ങേറിയത്. സർക്കാർ സ്പോൺസർ ഹർത്താലായിരുന്നു ഇത്. പോലീസ് തികഞ്ഞ നിഷ്ക്രിയത്വം കാണിച്ചുവെന്നും കുറ്റകരമായ അലംഭാവമായിരുന്നു അതെന്നും സുരേന്ദ്രൻ കുറ്റപ്പെടുത്തി.
