ഉരുളക്കിഴങ്ങും ബീറ്റ്‌റൂട്ടും കൂടിയുള്ള അത്ഭുതക്കൂട്ട്; മുഖത്തിന് നിറം വയ്‌ക്കാൻ മറ്റൊന്നും വേണ്ട

മുഖത്തിന് നിറം വയ്‌ക്കാനായി പരസ്യങ്ങളിൽ കാണുന്ന പല സാധനങ്ങളും വാങ്ങി തേക്കുന്നവരാണ് നമ്മളിൽ പലരും. എന്നാൽ ഇത് ഉപയോഗിക്കുന്നത് കൊണ്ട് യാതൊരു ഫലവും പലപ്പോഴും ഉണ്ടാവുകയുമില്ല. അങ്ങനെ നിരാശപ്പെട്ട് ഇരിക്കുന്നവർക്ക് സന്തോഷിക്കാനുള്ള വകയാണിത്. നമ്മുടെ നാടൻ സാധനങ്ങൾ ഉപയോഗിച്ച് തന്നെ നമുക്ക് വളരെ എളുപ്പത്തിൽ മുഖത്തിന്റെ നിറം വർദ്ധിപ്പിക്കാം. യാതൊരു പാർശ്വഫലങ്ങളും ഇല്ലെന്നതാണ് ഈ നാടൻ ഫെയ്‌സ്പാക്കിന്റെ ഏറ്റവും വലിയ പ്രത്യേകത. മൂന്നോ നാലോ തവണത്തെ ഉപയോഗം കൊണ്ട് തന്നെ ഫലം ലഭിക്കും എന്നതാണ് ഇതിന്റെ ഏറ്റവും വലിയ പ്രത്യേകത.

ഈ കൂട്ടിനായി വേണ്ടത് നമ്മുടെ അടുക്കളയിൽ തന്നെ എപ്പോഴും ഉണ്ടാകുന്ന നാല് സാധനങ്ങളാണ്. ഉരുളക്കിഴങ്ങ്, ബീറ്റ്‌റൂട്ട്, നേന്ത്രപ്പഴത്തിന്റെ തൊഴി, കഞ്ഞിവെള്ളം എന്നിവയാണിത്. ഇതിനായി ആദ്യം അൽപ്പം കഞ്ഞിവെള്ളം എടുത്ത് ഇതിലേക്ക് ഒരു നേന്ത്രപ്പഴത്തിന്റെ തൊലിയും ഒരു ചെറിയ കഷണം ഉരുളക്കിഴങ്ങും ഇടുക. ഒരു ചെറിയ ഉരുളക്കിഴങ്ങിന്റെ പകുതി ഭാഗം മതിയാകും. ഇവ മൂന്നും കൂടി അൽപ്പനേരം അടുപ്പത്ത് വച്ച് ചൂടാക്കുക. അധികനേരം ഇട്ട് തിളപ്പിക്കേണ്ടതില്ല. പരമാവധി അഞ്ച് മിനിട്ട് അടുപ്പത്ത് വച്ചാൽ മതിയാകും.

ഇത് തണുത്തതിന് ശേഷം മിക്‌സിയിൽ ഇട്ട് നന്നായി അടിച്ചെടുക്കുക. ഇതിലേക്ക് രണ്ടോ മൂന്നോ സ്പൂൺ ബീറ്റ്‌റൂട്ട് ജ്യൂസ് അല്ലെങ്കിൽ ബീറ്ററൂട്ട് അരച്ചത് ചേർക്കുക. ഇവ നന്നായി മിക്‌സ് ചെയ്ത് യോജിപ്പിക്കുക. ശേഷം ഈ കൂട്ട് മുഖത്തും, കഴുത്തിലുമെല്ലാം തേച്ചു പിടിപ്പിക്കുക. ഉണങ്ങിയതിന് ശേഷം കഴുകി കളയാവുന്നതാണ്. തുടർച്ചയായി നാല് ദിവസം വരെ ഇത് ചെയ്ത് കഴിയുമ്പോൾ തന്നെ നല്ല വ്യത്യാസം മുഖത്തിന് വരും. സൂര്യപ്രകാശം അടിച്ചുള്ള കരുവാളിപ്പ് മാറാനും ഈ കൂട്ട് നല്ലതാണ്.