മുപ്പത് വർഷങ്ങൾക്ക് മുൻപ് നടന്ന ഒരു രഹസ്യ മോതിരം കൈമാറലിന്റെ ചിത്രം പുറത്തുവിട്ടിരിക്കുകയാണ് സംവിധായകൻ പത്മരാജന്റെ മകൻ അനന്ത പത്മനാഭൻ. പത്മരാജന്റെ ഫോട്ടോയ്‌ക്ക് മുന്നിൽ നിന്നുകൊണ്ട് മോതിരം കൈമാറുന്നത് താരങ്ങളായ ജയറാമും പാർവ്വതിയും, എന്നാലിത് സിനിമയുടെ ഭാഗമായിരുന്നില്ല.
ജയറാമും പാർവ്വതിയും വിവാഹിതരാകുന്നതിന് മുൻപ് പത്മരാജന്റെ ചിത്രത്തിന് മുന്നിൽ നിന്നുകൊണ്ട് പരസ്പരം മോതിരം അണിയുന്ന ചിത്രങ്ങളാണിത്. തന്നെ സിനിമയിലേക്ക് കൈപിടിച്ചുയർത്തിയ സംവിധായകനോടുള്ള സ്‌നേഹപ്രകടനമായിരുന്നു അത്. ‘ പൊന്നിയിൽ സെൽവനി’ലെ ആഴ്വാർകടിയൻ നമ്പി എന്ന കഥാപാത്രത്തെ അവതരിപ്പിച്ച ജയറാമിനെ അഭിനന്ദിച്ചുകൊണ്ടാണ് ഇത് പങ്കുവെച്ചത്. ഒപ്പം ജയറാമുമായി നടത്തിയ ഫോൺ സംഭാഷണവും പങ്കുവെച്ചിട്ടുണ്ട്.
താൻ കഴിഞ്ഞയാഴ്ച പൊന്നിയിൻ സെൽവൻ കണ്ടിരുന്നുവെന്നും പടവും പെർഫോമൻസും ഗംഭീരമായിട്ടുണ്ടെന്നും അനന്ത പത്മനാഭൻ പറയുന്നുണ്ട്. നമ്പി എന്ന് പറയുന്നത് മാർത്താണ്ഡവർമ്മയിലെ ഭ്രാന്തൻ ചാന്നാന്റെ ഒരു കോമിക് വേർഷനാണ്. ആ ചിത്രത്തിലെ മൂഡ് മാറ്റി ലൈറ്റ് മൂടിലേക്ക് കൊണ്ടുവന്നത് നമ്പിയുടെ പ്രകടനമാണ്. കാർത്തി ഹ്യൂമർ ചെയ്യുന്നുണ്ടെങ്കിലും അതിൽ നമ്മൾ കണ്ടിട്ടുള്ള ബോഡി ലാംഗ്വേജ് ആണ്. പക്ഷേ നമ്പി ചെയ്യുന്നത് വളരെ വ്യത്യസ്തമായിട്ടാണ് വലിയൊരു റിസേർച് തന്നെ ഇതിന് പിന്നിലുണ്ടെന്ന് തോന്നുന്നു എന്നും അനന്ത പത്മനാഭൻ പറയുന്നു.
ഇതിന് നന്ദി പറഞ്ഞ ജയറാം തനിക്ക് വളരെയേറെ അഭിനന്ദങ്ങൾ ഇപ്പോഴും ലഭിച്ചുകൊണ്ടിരിക്കുകയാണെന്നും അതിൽ വളരെ സന്തോഷമുണ്ടെന്നും പറഞ്ഞു. രജനികാന്ത് തൊട്ട് ഇങ്ങോട്ട്, അല്ലെങ്കിൽ മറ്റു ഭാഷകളിൽ നിന്ന് നിത്യേന അഭിനന്ദനങ്ങൾ വരികയാണ്.
പത്മരാജൻ സാർ ഉണ്ടായിരുന്നെങ്കിൽ എന്തുമാത്രം സന്തോഷിച്ചേനെ അദ്ദേഹം കൊണ്ടുവന്ന ഒരാൾ 35 വർഷങ്ങൾക്ക് ശേഷവും എന്തെങ്കിലുമൊക്കെ ചെയ്തു നിൽക്കുന്നില്ലേ, നന്നായി എന്ന് ആൾക്കാരെകൊണ്ടു പറയിക്കുന്നില്ലേ. സാർ ഉണ്ടായിരുന്നെങ്കിൽ എന്തുമാത്രം സന്തോഷിക്കുമായിരുന്നു. സാറിന്റെ ആത്മാവ് മുകളിൽ ഇരുന്നു സന്തോഷിക്കുന്നുണ്ടാവും എന്നും ജയറാം പറയുന്നു.
Comments