അച്ചാറില്ലാത്ത വീട് കേരളത്തിൽ അപൂർവ്വമായിരിക്കും. മലയാളിയ്ക്ക് അച്ചാറിനോടുള്ള പ്രിയം അത്ര തന്നെയുണ്ട്. മാങ്ങയും നാരങ്ങയും മീനും ഇറച്ചിയും തുടങ്ങി തേങ്ങ വരെ അച്ചാറാക്കുന്ന നാടാണ് നമ്മുടേത്. അച്ചാറിന് രുചി കൂടണമെങ്കിൽ പഴകണമെന്നാണ് പണ്ടുള്ളവർ പറഞ്ഞിരുന്നത്. എന്നാൽ ഇന്ന് അച്ചാർ പൂത്തുപോകുന്നതാണ് പ്രധാന പ്രശ്നം. അച്ചാറിട്ട് ദിവസങ്ങൾക്കുള്ളിൽ തന്നെ പൂക്കുന്നത് വളരെ ഗുരുതരമായ പ്രശ്നമെന്നാണ് പല വീട്ടമ്മമാരും പറയുന്നത്.
ഇങ്ങനെ പൂപ്പലുള്ള അച്ചാർ കഴിക്കുന്നത് വഴി നിരവധി ആരോഗ്യ പ്രശ്നങ്ങളാണ് നമ്മളെ തേടിയെത്തുന്നത്. പൂപ്പൽ ഉള്ളിൽ ചെന്നാൽ വിരലുകൾക്കിടയിലുള്ള ഭാഗത്തെ ബാധിക്കുന്ന അത്ലെറ്റസ് ഫൂട്ട് എന്ന ഫംഗൽ രോഗം വരാൻ ഇടയുണ്ട്. ഈർപ്പമുള്ള പ്രതലത്തിലാണ് അധികവും പൂപ്പൽ വളരുന്നത്. ജലാംശം കുറഞ്ഞ രീതിയിൽ അച്ചാറിട്ടാൽ ഇതിന് പരിഹാരമാകും. വൃത്തിയുള്ള തുണി കൊണ്ട് നനവ് ഇല്ലാത്ത സ്പൂൺ ഉപയോഗിച്ച് വേണം അച്ചാർ വിളമ്പേണ്ടത്. വെയിലത്ത് വെച്ചുണക്കിയ മാങ്ങയോ മീനോ കൊണ്ട് തയ്യാറാക്കിയ അച്ചാറിൽ പൂപ്പൽ ഇല്ലാത്തതിന് കാരണമിതാണ്. അച്ചാർ പൂക്കുന്നത് തടയാനുള്ള ചില പൊടിക്കൈകളുണ്ട്. ഇത്തരത്തിൽ ചെയ്താൽ പൂപ്പലിനോട് വിട പറയാം..
* അച്ചാറിടാൻ ഉദ്ദേശിക്കുന്ന സാധനം കഴുകി കഴിഞ്ഞാൽ വെള്ളം പോയെന്ന് ഉറപ്പ് വരുത്തിയതിന് ശേഷം മാത്രമെ ഇടാവൂ. വെയിലത്ത് വെച്ചതിന് ശേഷം അച്ചാറിട്ടാലും മതിയാകും.
* വെള്ളിച്ചെണ്ണയ്ക്ക് പകരം നല്ലെണ്ണ ഉപയോഗിക്കുന്നകത് പൂപ്പലിനെ തടയും.
* അച്ചാർ പ്ലാസ്റ്റിക് പാത്രത്തിലിട്ട് വെയ്ക്കുന്നതിന് പകരം ചില്ല് പാത്രത്തിൽ സൂക്ഷിക്കുക.
* അച്ചാർ ഭരണിയിൽ അച്ചാറിന് മുകളിൽ എണ്ണ തെളിഞ്ഞ് നിൽക്കുന്ന രീതിയിൽ സൂക്ഷിച്ച് വെയ്ക്കുക.
* ഭരണിയിലും വെള്ളത്തിന്റെ അംശമില്ലെന്ന് ഉറപ്പ് വരുത്തുക. വെയിലത്തുണക്കിയ ശേഷം ഭരണിയിലേക്ക് മാറ്റുക.
* അച്ചാറിൽ കറിവേപ്പില വറുത്ത ശേഷമോ വെയിലത്ത് ഉണക്കിയ ശേഷമോ ചേർക്കുക. പച്ചകറിവേപ്പില ചേർക്കുന്നത് പൂപ്പൽ വരാൻ സാദ്ധ്യതയുണ്ട്.
* അച്ചാർ അടങ്ങിയ ഭരണി ആഴ്ച്ചയിൽ ഒരിക്കൽ വെയിലത്ത് വയ്ക്കുക
* ഈർപ്പമില്ലാത്ത സ്പൂൺ ഉപയോഗിച്ച് മാത്രമെ അച്ചാറെടുക്കാവൂ
* ഇടയ്ക്കിടെ അച്ചാർ കുപ്പി തുറക്കുന്നത് പൂപ്പൽ വളർച്ചയെ തടയും.
* ഫ്രിഡ്ജിൽ സൂക്ഷിക്കുന്നതും പൂപ്പലിനെ തടയും
