‘എന്റെ അടുത്ത പ്രോജക്ട് ലിജോയുടെ കൂടെ’; പ്രഖ്യാപനം നടത്തി മോഹൻലാൽ; ആരാധകർ ആവേശത്തിൽ- Mohanlal, Lijo Jose Pellissery

മോഹൻലാൽ ആരാധകർ ഏറെ കാത്തിരുന്ന പ്രഖ്യാപനം താരം തന്നെ നടത്തിയിരിക്കുകയാണ്. യുവ സംവിധായകർക്കൊപ്പം ഒരു ചിത്രം മോഹൻലാൽ ചെയ്യുന്നില്ല എന്ന നിരാശ ആരാധകർക്കിടയിലും സിനിമാ പ്രേമികൾക്കിടയിലും ഉണ്ടായിരുന്നു. എന്നാൽ കഴിഞ്ഞ ദിവസം മോഹൻലാൽ ലിജോ ജോസ് പെല്ലിശ്ശേരിക്കൊപ്പം നിൽക്കുന്ന ചിത്രം പുറത്തു വന്നതോടെ ഇരുവരും ചേർന്നുള്ള ഒരു ചിത്രം ഉറപ്പായി എന്ന് വാർത്തകൾ വന്നിരുന്നു. ഇപ്പോൾ താരം തന്നെ ആ വാർത്ത സ്ഥിരീകരിച്ചിരിക്കുകയാണ്. ലിജോയ്‌ക്കൊപ്പമുള്ള ചിത്രങ്ങൾ പങ്കുവെച്ചു കൊണ്ട് അടുത്ത ചിത്രം ഉടൻ ഉണ്ടാകുമെന്ന് അറിയിച്ചിരിക്കുകയാണ് മോഹൻലാൽ.

‘എന്റെ അടുത്ത പ്രോജക്ട് ഇന്ത്യൻ സിനിമയിലെ ഏറ്റവും ആവേശമുള്ള കഴിവുള്ള സംവിധായകരിലൊരാളായ ലിജോ ജോസ് പെല്ലിശ്ശേരിക്കൊപ്പമായിരിക്കും എന്ന് അറിയിക്കുന്നതിൽ എനിക്ക് സന്തോഷമുണ്ട്. ജോൺ ആൻഡ് മേരി ക്രിയേറ്റീവ്, മാക്സ് ലാബ്സ്, സെഞ്ച്വറി ഫിലിംസ് എന്നിവർ ചേർന്നാണ് ഈ പ്രൊജക്ട് നിർമ്മിക്കുന്നത്’ എന്നാണ് മോഹൻലാൽ പറഞ്ഞിരിക്കുന്നത്.

യുവ സംവിധായകരിലെ ജനപ്രിയനായ വ്യത്യസ്ഥതത കൊണ്ട് സിനിമയിൽ മാന്ത്രികത തീർക്കുന്ന ലിജോ ജോസ് പെല്ലിശ്ശേരിയുടെ ഒപ്പം മോഹൻലാൽ ഒന്നിക്കുന്നു എന്ന വാർത്ത സിനിമാ പ്രേമികൾ ഏറ്റെടുത്തു കഴിഞ്ഞു. ഒരു പുരാവൃത്തത്തെ ആസ്പദമാക്കിയുള്ള ബിഗ് ബജറ്റ് ചിത്രത്തിൽ ഒരു ​ഗുസ്തിക്കാരനായാണ് മോഹൻലാൽ എത്തുക. ഷിജു ബേബി ജോൺ നിർമ്മിക്കുന്ന ചിത്രം രാജസ്ഥാനിലാണ് ഷൂട്ടിം​ഗ് ആരംഭിക്കുക.