നീർനായ ഇങ്ങനെ പെരുമാറുമോ? സ്‌കൂബ ഡൈവറെ ഞെട്ടിച്ച് ഒരു നീർനായ; 22 മില്യൺ കാഴ്ചക്കാരെ നേടിയ വീഡിയോ ഇതാണ്..

പോസ്റ്റ് ചെയ്ത് രണ്ട് ദിവസം മാത്രം പിന്നിടുമ്പോഴേക്കും 22 മില്യൺ കാഴ്ചക്കാരെ ട്വിറ്ററിൽ നേടിയിരിക്കുകയാണ് ഒരു വീഡിയോ. 32 സെക്കൻഡ് മാത്രം ദൈർഘ്യമുള്ള ഒരു വീഡിയോ എങ്ങനെയാണ് ഇത്രയധികം കാഴ്ചക്കാരെ നേടിയതെന്ന് തോന്നാം. കാണുന്ന ഏതൊരാളുടെയും മനസ് നിറയ്‌ക്കാനും ചുണ്ടിൽ പുഞ്ചിരി വിടർത്താനും ഈ വീഡിയോയ്‌ക്ക് കഴിയുമെന്നതാണ് പ്രത്യേകത. അതുകൊണ്ട് തന്നെയാണ് മണിക്കൂറുകൾക്കൊണ്ട് ഈ ദൃശ്യങ്ങൾ ലോകം മുഴുവൻ വൈറലായതും..

ഒരു സ്‌കൂബ ഡൈവറും നീർനായയുമാണ് ദൃശ്യങ്ങളിലെ താരങ്ങൾ. ‘സമുദ്രലോകത്തെ നായകളാണ് ഇവ’ എന്ന തലക്കെട്ടോടെയാണ് ദൃശ്യങ്ങൾ പങ്കുവെച്ചിരിക്കുന്നത്. ‘വണ്ടർ ഓഫ് സയൻസ്’ എന്ന പേജാണ് പോസ്റ്റ് ചെയ്തത്. സ്‌കൂബ ഡൈവറുമായി അത്യധികം സ്‌നേഹത്തോടെ ഇടപഴകുന്ന നീർനായയെ നമുക്ക് വീഡിയോയിൽ കാണാനാകും. സാധാരണ വീടുകളിൽ വളർത്താറുള്ള മൃഗങ്ങൾ എപ്രകാരമാണോ വീട്ടുകാരോട് സ്‌നേഹവും അടുപ്പവും കാണിക്കുന്നത് അപ്രകാരമാണ് ഇവിടെ നീർനായ സ്‌കൂബ ഡൈവിംഗ് ചെയ്യുന്ന വ്യക്തിയോട് ഇടപഴകുന്നത്. ഒരു പൂച്ചയെ തലോടുന്നത് പോലെ അദ്ദേഹം നീർനായയെ തലോടുകയും ചെയ്യുന്നുണ്ട്.

Seals are the dogs of the sea.pic.twitter.com/M3aKX3tR88

— Wonder of Science (@wonderofscience) October 26, 2022

അദ്ദേഹത്തെ ആലിംഗനം ചെയ്യുന്ന മട്ടിൽ നീർനായ ചേർന്ന് നിൽക്കുന്നതും ദൃശ്യങ്ങളിൽ കാണാം.. സമുദ്രത്തിൽ കാണപ്പെടുന്ന ജീവജാലങ്ങളിൽ കളിക്കൂട്ടുകാരെ പോലെ പെരുമാറുന്നവയാണ് നീർനായ്‌ക്കൾ എന്ന് ചിലർ ഇതിനോട് പ്രതികരിച്ചു. കടൽതീരത്ത് കിടക്കുന്ന നായയുടെ അരികിൽ സ്‌നേഹത്തോടെ പറ്റിക്കിടക്കുന്ന ഒരു നീർനായയുടെ ഹ്രസ്വ വീഡിയോയും ഇതിന് കമന്റായി ചിലർ പോസ്റ്റ് ചെയ്തിരുന്നു.