ചീഫ് ജസ്റ്റിസായി സത്യപ്രതിജ്ഞ  ചെയ്ത് ജസ്റ്റിസ് ഡി.വൈ.ചന്ദ്രചൂഡ്

ന്യൂഡൽഹി : ഇന്ത്യയുടെ അമ്പതാം ചീഫ് ജസ്റ്റിസായി ജസ്റ്റിസ് ഡി.വൈ.ചന്ദ്രചൂഡ് സത്യപ്രതിജ്ഞ ചെയ്തു. രാഷ്‌ട്രപതി ഭവനിൽ നടന്ന ചടങ്ങിൽ രാഷ്‌ട്രപതി ദ്രൗപദി മുർമു സത്യവാചകം ചൊല്ലിക്കൊടുത്തു. 2024 നവംബർ 11ന് വിരമിക്കുന്ന ജസ്റ്റിസ് ചന്ദ്രചൂഡിന് രണ്ട് വർഷത്തെ കാലാവധിയുണ്ടാകും.സുപ്രീം കോടതി ചീഫ് ജസ്റ്റിസ് സ്ഥാനത്ത് നിന്ന് യു യു ലളിത് വിരമിച്ചതിന് പിന്നാലെയാണ് അദ്ദേഹം ചുമതലയേറ്റത്. ഉപരാഷ്‌ട്രപതി ജഗ്ദീപ് ധൻഖർ, ലോക്സഭാ സ്പീക്കർ ഓം ബിർള, കേന്ദ്ര ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിംഗ്, ധനമന്ത്രി നിർമ്മല സീതാരാമൻ തുടങ്ങിയവർ ചടങ്ങിൽ പങ്കെടുത്തു.

സുപ്രീം കോടതിയിലെ ഏറ്റവും മുതിർന്ന രണ്ടാമത്തെ ജഡ്ജിയാണ് ജസ്റ്റിസ് ഡി വൈ ചന്ദ്രചൂഡ്. 2016 മേയ് 13ന് സുപ്രീം കോടതി ജഡ്ജിയായി നിയമിതനായ ഡി.വൈ.ചന്ദ്രചൂഡ് അലഹബാദ് ഹൈക്കോടതിയുടെ മുൻ ചീഫ് ജസ്റ്റിസും ബോംബെ ഹൈക്കോടതിയിലെ ജഡ്ജിയുമായിരുന്നു. ബോംബെ ഹൈക്കോടതി ജഡ്ജി ആകുന്നതുവരെ ഇന്ത്യയുടെ അഡീഷണൽ സോളിസിറ്റർ ജനറലായും സേവനമനുഷ്ഠിച്ചു.ഇദ്ദേഹത്തിന്റെ പിതാവ് വൈ.വി.ചന്ദ്രചൂഡ് സുപ്രീംകോടതിയുടെ 16ാം ചീഫ് ജസ്റ്റിസായിരുന്നു.

സ്വകാര്യത മൗലികാവകാശമാണെന്ന് വിധിച്ചും, വിവാഹേതരബന്ധം ക്രിമിനൽ കുറ്റമാക്കുന്ന വകുപ്പ് റദ്ദാക്കിയും പിതാവ് വൈ.വി.ചന്ദ്രചൂഡിന്റെ വിധികൾ ഡി.വൈ.ചന്ദ്രചൂഡ് രണ്ട് തവണ തിരുത്തിയിട്ടുണ്ട്. അയോദ്ധ്യ ഭൂമി തർക്കം ഉൾപ്പെടെയുള്ള ഭരണഘടനാ ബെഞ്ചുകളുടെയും സുപ്രീം കോടതിയുടെ വിധികളുടെയും ഭാഗമായിരുന്നു അദ്ദേഹം. ആധാർ പദ്ധതിയുടെ സാധുത, ശബരിമല വിഷയം എന്നിവയുമായി ബന്ധപ്പെട്ട ബെഞ്ചുകളിലും ജസ്റ്റിസ് ചന്ദ്രചൂഡ് ഉൾപ്പെട്ടിരുന്നു.