ടി20 ലോകകപ്പ് സെമി: ന്യൂസിലാന്റിനെതിരെ പാകിസ്താന് 153 റൺസ് വിജയലക്ഷ്യം

സിഡ്‌നി: ലോകകപ്പ് ടി20 ക്രിക്കറ്റിന്റെ ആദ്യ സെമിയിൽ ന്യൂസിലാന്റിനെതിരെ പാകിസ്താന് 153 റൺസ് വിജയലക്ഷ്യം. നാല് വിക്കറ്റ് നഷ്ടത്തിൽ കിവീസ് 152 റൺസാണ് എടുത്തത്.

മദ്ധ്യനിരയിൽ അർദ്ധസെഞ്ച്വറി നേടിയ ഡാരിൽ മിച്ചലും 46 റൺസ് എടുത്ത നായകൻ കെയ്ൻ വില്യംസണുമാണ് പൊരുതാവുന്ന സ്‌കോർ സമ്മാനിച്ചത്. പാകിസ്താന് വേണ്ടി ഷഹീൻ അഫ്രിദി രണ്ടു വിക്കറ്റ് വീഴ്‌ത്തി.

ഓപ്പണർമാരായ ഫിൻ അലെൻ(4) റൺസിനും ഡെവൺ കോൺവോയ്(21) റൺസിനും ഗ്ലെൻ ഫിലിപ്‌സ്(6) റൺസിനും പുറത്തായതാണ് കിവീസിന് മികച്ച സ്‌കോർ നേടുന്നതിന് തടസ്സമായത്. തുടർന്ന് വില്യംസണും മിച്ചലും ചേർന്നുള്ള അവസരോചിത ബാറ്റിംഗാണ് 3 ന് 49ൽ നിന്നും 4-117 എന്ന ഭേദപ്പെട്ട നിലയിലേയ്‌ക്ക്  കിവീസിനെ 17-ാം ഓവറിൽ എത്തിച്ചത്. തുടർന്ന് 18 പന്തിൽ മിച്ചലും നീഷാമും(16 നോട്ടൗട്ട്) അടിച്ചുകൂട്ടിയ 35 റൺസാണ് സ്‌കോർ 150ന് പുറത്ത് എത്തിച്ചത്.