എൽദോസ് കുന്നപ്പിളളിലിനെതിരെ പീഡന പരാതി ; പരാതിക്കാരിയെ മർദ്ദിച്ചെന്ന കേസ് റദ്ദാക്കാൻ ആവശ്യപ്പെട്ട് എംഎൽഎയുടെ അഭിഭാഷകർ ഹൈക്കോടതിയിൽ

തിരുവനന്തപുരം : എൽദോസ് കുന്നപ്പിളളിലിനെതിരെ പീഡന പരാതി നൽകിയ യുവതിയെ മർദ്ദിച്ച കേസിൽ പ്രതികളായ അഭിഭാഷകർ കോടതിയെ സമീപിച്ചു. അഡ്വ. അലക്‌സ് എം, അഡ്വ. ജോസ് ജെ ചെറുവള്ളി, അഡ്വ.സുധീർ പി.എസ് എന്നിവരാണ് വഞ്ചിയൂർ പോലീസ് എടുത്ത കേസ് റദ്ദാക്കണമെന്ന് ആവശ്യപ്പെട്ട് ഹൈക്കോടതിയെ സമീപിച്ചിരിക്കുന്നത്. എൽദോസ് കുന്നപ്പിള്ളിയ്‌ക്ക് നിയമസഹായം നൽകുന്നതിൽ നിന്ന് തടയുകയാണ് പോലീസിന്റെ ലക്ഷ്യം.പരാതിക്കാരിയെ മർദ്ദിച്ചത് കെട്ടിച്ചമച്ച ആരോപണമാണ്. ഇക്കാര്യം തെളിയിക്കാൻ സംഭവസ്ഥലത്ത് നിന്നുള്ള സിസിടിവി ദൃശ്യങ്ങൾ പരിശോധിക്കണമെന്നും അഭിഭാഷകർ ആവശ്യപ്പെടുന്നു.

പരാതിക്കാരിയായ യുവതിയെ മർദ്ദിച്ചു എന്ന പരാതിയിലാണ് പോലീസ് അഭിഭാഷകർക്കെതിരെ കേസെടുത്തത്. തിരുവനന്തപുരം സിറ്റി പൊലീസിന് കീഴിൽ വഞ്ചിയൂർ പോലീസിന്റെതാണ് നടപടി.

ഇതിനിടെയ കേസിൽ എൽദോസിന്റെ മുൻകൂർ ജാമ്യം റദ്ദാക്കണമെന്ന സർക്കാർ അപ്പീൽ പരിഗണിക്കുന്നതും ഹൈക്കോടതി മാറ്റിവച്ചിരുന്നു. തിങ്കളാഴ്ചത്തേക്കാണ് അപ്പീൽ മാറ്റിയിരിക്കുന്നത്. തിരുവനന്തപുരം അഡീഷണൽ സെഷൻസ് കോടതി നൽകിയ മുൻകൂർ ജാമ്യം റദ്ദാക്കണമെന്നാവശ്യപ്പെട്ട് പരാതിക്കാരിയും കോടതിയെ സമീപിച്ചു. മജിസ്‌ട്രേറ്റിന് നൽകിയ രഹസ്യ മൊഴിയിൽ ബലാത്സംഗം സംബന്ധിച്ച കൃത്യമായ വിവരങ്ങൾ നൽകിയിട്ടും ജാമ്യം നൽകിയത് നിയമപരമായല്ല എന്നാണ് പരാതിക്കാരിയുടെ വാദം.