ആയിരം ക്ഷേത്രങ്ങളുടെ നഗരമെന്നറിയപ്പെടുന്ന കാഞ്ചീപുരം.. തെക്കിന്റെ ബനാറസ് എന്ന് പലരും വിശേഷിപ്പിക്കുന്ന ഇവിടം വിനോദ സഞ്ചാരികൾക്ക് ഏറെ പ്രിയപ്പെട്ട ഇടം കൂടിയാണ്.. പട്ടുസാരികൾക്ക് പ്രശസ്തമായ കാഞ്ചീപുരം നഗരത്തിന്റെ പ്രത്യേകതകളും ആ പേര് വന്നതെങ്ങിനെയാണെന്നും നോക്കാം..
ഇന്ത്യയിലെ തന്നെ ഏറ്റവും പഴക്കം ചെന്ന നഗരങ്ങളിലൊന്നാണ് കാഞ്ചീപുരം. ഇവിടുത്തെ ക്ഷേത്രങ്ങളുടെ പെരുമ മൂലമാണ് ആയിരം ക്ഷേത്രങ്ങളുടെ നഗരമെന്ന വിശേഷണം കാഞ്ചീപുരത്തിന് ലഭിച്ചത്.
ഹിന്ദുമത വിശ്വാസമനുസരിച്ച് ആത്മീയ മോക്ഷത്തിനായി എത്തിച്ചേരേണ്ട ഏഴ് പുണ്യനഗരങ്ങളിലൊന്നാണ് കാഞ്ചീപുരം. ചെന്നൈയിൽ നിന്ന് വെറും 72 കിലോ മീറ്റർ ദൂരം സഞ്ചരിച്ചാൽ ക്ഷേത്രനഗരമായ കാഞ്ചീപുരത്ത് എത്താം. തോണ്ടൈമണ്ഡലം എന്ന സ്ഥലത്ത് വേഗാവതി നദിയുടെ തീരത്താണ് കാഞ്ചീപുരം സ്ഥിതിചെയ്യുന്നത്.
‘ക’ , ആഞ്ചി എന്നീ വാക്കുകളിൽ നിന്നാണ് കാഞ്ചീപുരമെന്ന പേരുവന്നത്. ഇതിൽ ക എന്നത് ബ്രഹ്മാവിനെയും ആഞ്ചി എന്നത് ഭഗവാൻ വിഷ്ണുവിനോടുള്ള അദ്ദേഹത്തിന്റെ ആരാധനയേയും സൂചിപ്പിക്കുന്നു. അതുകൊണ്ട് തന്നെ കാഞ്ചീപുരത്ത് എണ്ണമറ്റ വിഷ്ണു ക്ഷേത്രങ്ങൾ നിലകൊള്ളുന്നുണ്ട്.
ധാരാളം ശിവക്ഷേത്രങ്ങളും കാഞ്ചീപുരത്തിന്റെ മറ്റൊരു ഭാഗത്ത് സ്ഥിതിചെയ്യുന്നു. കാഞ്ചീപുരത്തിന്റെ പടിഞ്ഞാറ് ഭാഗത്താണ് ശിവക്ഷേത്രങ്ങൾ അധികമുള്ളത്. ഇവിടം ശിവകാഞ്ചി എന്ന് അറിയപ്പെടുന്നു. വിഷ്ണുക്ഷേത്രങ്ങൾ കൂടുതലുള്ള കാഞ്ചീപുരത്തിന്റെ കിഴക്ക് ഭാഗം വിഷ്ണുകാഞ്ചി എന്നാണ് അറിയപ്പെടുന്നത്.
വർഷം മുഴുവനും നൂറുകണക്കിന് ഭക്തരാണ് കാഞ്ചീപുരത്തെ ക്ഷേത്രങ്ങൾ ദർശിക്കാനെത്തുക. വരദരാജ പെരുമാൾ ക്ഷേത്രം, ഏകാംബരേശ്വര ക്ഷേത്രം, കാമാക്ഷി അമ്മൻ ക്ഷേത്രം, കുമാരകോട്ടം ക്ഷേത്രം എന്നിവ കാഞ്ചീപുരത്തെ പ്രധാന ഹിന്ദു ക്ഷേത്രങ്ങളാണ്. ഭഗവാൻ വിഷ്ണുവിന്റെ പ്രധാനപ്പെട്ട 108 ക്ഷേത്രങ്ങളിൽ പതിനഞ്ചും സ്ഥിതി ചെയ്യുന്നത് കാഞ്ചീപുരത്താണ്. രാജാവായിരുന്ന നരസിംഹവർമാൻ രണ്ടാമനാണ് കാഞ്ചീപുരത്തെ പ്രധാനപ്പെട്ട ക്ഷേത്രങ്ങളായ കാഞ്ചി കൈലാസനാഥർ ക്ഷേത്രം, വരദരാജ പെരുമാൾ ക്ഷേത്രം, ഐരാവതേശ്വര ക്ഷേത്രം എന്നിവ നിർമ്മിച്ചത്.
പട്ടുസാരികൾക്ക് പ്രശസ്തമായ കാഞ്ചീപുരത്തെ പ്രധാന വരുമാനം നെയ്ത്തുവ്യവസായം തന്നെയാണ്. ഏകദേശം അയ്യായിരത്തിനടുത്ത് കുടുംബങ്ങൾ കാഞ്ചീപുരത്തെ നെയ്ത്തു മേഖലയിൽ പ്രവർത്തിക്കുന്നു. സ്വർണനൂലിഴകളാൽ നെയ്ത കാഞ്ചീപുരം പട്ടുസാരികൾ ലോക പ്രശസ്തവുമാണ്. പ്രാചീന കാലം മുതൽക്കെ പേരുകേട്ട കാഞ്ചീപുരം പട്ടിന് ഇന്നും നിരവധി ആരാധകരാണുള്ളത്.
Comments