വില കൂട്ടി വോൾവോ; XC40 റീചാർജിന് ഈ ദിവസം മുതൽ ഇന്ത്യയിൽ വില കൂടും

കാറുകൾക്ക് വില വർദ്ധിക്കാനൊരുങ്ങി സ്വീഡിഷ് കാർ നിർമ്മാതാതാക്കളായ വോൾവോ. ആഗോള പണപ്പെരുപ്പവും നിർമ്മാണ ചിലവുകളും വർദ്ധിക്കുന്ന സാഹചര്യത്തിലാണ് തങ്ങളുടെ വാഹനങ്ങൾക്ക് വില കൂട്ടേണ്ടി വന്നതെന്ന്‌ വോൾവോ കാർ ഇന്ത്യയുടെ മാനേജിംഗ് ഡയറക്ടർ ജ്യോതി മൽഹോത്ര പറഞ്ഞു. തിരഞ്ഞെടുത്ത മോഡലുകളിൽ 2022 നവംബർ 25 മുതൽ വർദ്ധനവ് പ്രാബല്യത്തിൽ വരുത്താനാണ് കമ്പനി തീരുമാനിച്ചിരിക്കുന്നത്.

S90 പെട്രോൾ മൈൽഡ്-ഹൈബ്രിഡ്, XC40 പെട്രോൾ മൈൽഡ്-ഹൈബ്രിഡ് എന്നിവയുടെ വില മാറ്റമില്ലാതെ തുടരും. നവംബർ 24 വരെ കാറുകൾ ബുക്ക് ചെയ്തവർക്ക് വില വർദ്ധന ബാധിക്കില്ല എന്നും വോൾവോ വ്യക്തമാക്കി. XC40 റീചാർജ് പ്യുവർ ഇലക്ട്രിക് എസ്‍യുവി, XC90 എസ്‍യുവി, XC40 പെട്രോൾ മോഡൽ, ആഡംബര സെഡാൻ S90 എന്നിവയാണ് നിലവിൽ ഇന്ത്യയിൽ കമ്പനി വിൽക്കുന്നത്. XC40 റീചാർജ് കൂടാതെ, മറ്റെല്ലാ മോഡലുകളും പെട്രോൾ മൈൽഡ്-ഹൈഗ്രിഡ് പവർട്രെയിനുമായി വരുന്നു.

അതേസമയം, പ്രാദേശികമായി അസംബിൾ ചെയ്ത ഇലക്ട്രിക് ആഡംബര എസ്‌യുവി വിൽക്കുന്ന ആദ്യ കാർ നിർമ്മാതാവായി വോൾവോ കാർ ഇന്ത്യ മാറി. XC40 റീചാർജ് പ്രാദേശികമായി അസംബിൾ ചെയ്ത ആദ്യത്തെ പൂർണ്ണ വൈദ്യുത ആഡംബര എസ്‌യുവിയാണ്. 2030-ഓടെ ഓൾ-ഇലക്‌ട്രിക് കമ്പനിയാകാനുള്ള വോൾവോയുടെ യാത്രയിലെ ഒരു പ്രധാന ചുവടുവെയ്പ്പാണ് ഇത്. ബെംഗളൂരുവിനടുത്ത് ഹോസ്‌കോട്ടിലുള്ള വോൾവോ കാർ ഇന്ത്യയുടെ പ്ലാന്റിലാണ് ഇത് അസംബിൾ ചെയ്തിരിക്കുന്നത്.