ലക്‌നൗ: പുതിയ ചിത്രത്തിന്റെ വിജയത്തിന് പിന്നാലെ കാശി വിശ്വനാഥന്റെ അനുഗ്രഹം തേടി ബോളിവുഡ് താരം അജയ് ദേവ് ഗൺ. രാവിലെയാണ് അദ്ദേഹം കാശി വിശ്വനാഥ ക്ഷേത്രത്തിൽ ദർശനം നടത്തിയത്. ഇതിന്റെ ചിത്രങ്ങൾ അജയ് ദേവ്ഗൺ ട്വിറ്ററിൽ പങ്കുവെച്ചു.
നീണ്ട കാലത്തെ കാത്തിരിപ്പിന് ശേഷമാണ് അജയ് ദേവ്ഗൺ ക്ഷേത്രത്തിൽ എത്തുന്നത്. കാശിവിശ്വ നാഥ ഇടനാഴി പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തതിന് പിന്നാലെ നിരവധി തവണ അദ്ദേഹം ദർശനം നടത്താൻ തയ്യാറെടുത്തിരുന്നു. എന്നാൽ ഷൂട്ടിംഗ് തിരക്കുകൾ കാരണം ഇതെല്ലാം മറ്റൊരു ദിവസത്തേക്ക് മാറ്റുകയായിരുന്നു. ക്ഷേത്രത്തിൽ വിവിധ വഴിപാടുകൾ കഴിച്ച അജയ് ദേവ്ഗൺ വിശേഷ പൂജകളിൽ പങ്കെടുത്ത ശേഷമാണ് ക്ഷേത്രത്തിൽ നിന്നും മടങ്ങിയത്.
അദ്ദേഹത്തിന്റെ പുതിയ ചിത്രം ദൃശ്യം 2 ഒരു വാരം കൊണ്ട് നൂറ് കോടി കളക്ഷൻ നേടിയിരുന്നു. ഇതിന് പിന്നാലെയാണ് അദ്ദേഹം ക്ഷേത്രത്തിൽ ദർശനം നടത്തിയത്. ഭോലയാണ് അജയ് ദേവ്ഗണിന്റെ അടുത്ത ചിത്രം. തികഞ്ഞ ശിവഭക്തനാണ് അജയ് ദേവ്ഗൺ. നെഞ്ചിന്റെ ഇടതുവശത്തായി അദ്ദേഹം ശിവഭഗവാന്റെ ചിത്രം പച്ചകുത്തിയത് ഏറെ ശ്രദ്ധ നേടിയിരുന്നു. അതേസമയം ക്ഷേത്രത്തിൽ പൂജ നടത്തുന്ന താരത്തിന്റെ ചിത്രം സോഷ്യൽ മീഡിയയിൽ വൈറലായിക്കഴിഞ്ഞു.
Comments