ആരാധകരേറെയുള്ള ബോളിവുഡ് നടിയാണ് സോനം കപൂര്‍. സിനിമയിൽ മാത്രമല്ല, സമൂഹമാദ്ധ്യമങ്ങളിലും മിന്നി തിളങ്ങുന്ന താരത്തെ ഏറ്റവും ഫാഷന്‍ സെന്‍സുള്ള നായിക എന്നാണ് പലരും വിശേഷിപ്പിക്കുന്നത്. വസ്ത്രധാരണത്തിലെ വ്യത്യസ്തത കൊണ്ടും പുതിയ ഫാഷൻ പരീക്ഷണങ്ങളിലൂടെയും ആരാധകരുടെ മനം മയക്കുന്ന സോനത്തിന്റെ പുതിയ ചിത്രങ്ങൾ ഇപ്പോൾ സമൂഹമാദ്ധ്യമങ്ങളിൽ വൈറലാകുകയാണ്. മഞ്ഞ നിറത്തിലുള്ള സൽവാറിൽ സുന്ദരിയായിരിക്കുകയാണ് താരം.
എംബ്രോയ്ഡറി ചെയ്ത മനോഹരമായ കുര്‍ത്ത അണിഞ്ഞിരിക്കുന്ന സോനം, ബൺ ഹെയർസ്റ്റൈലിലാണ് മുടി ഒരുക്കിയിരിക്കുന്നത്. മുടിയിൽ മുല്ലപ്പൂവും ചൂടിയിരിക്കുന്നു. നെറ്റിയിൽ പച്ച നിറമുള്ള ചെറിയ പൊട്ട്, വലിയ കമ്മലുകളും, വിരലുകളിൽ തിളങ്ങുന്ന കല്ലുകൾ കൊണ്ടുള്ള മോതിരവും സോനം കപൂർ അണിഞ്ഞിരിക്കുന്നത് കാണാം. മുംബൈയിൽ ഒരു വിവാഹ ആഘോഷത്തിൽ പങ്കെടുക്കുന്നതിനായി അണിഞ്ഞൊരുങ്ങിയതായിരുന്നു താരം. സോനം പങ്കുവച്ച ചിത്രങ്ങൾക്ക് താഴെ താരത്തിന്റെ പിതാവും നടനുമായ അനില്‍ കപൂറും കമന്റ് ചെയ്തിട്ടുണ്ട്. ‘ക്ലാസിക്’ എന്നാണ് അനില്‍ കപൂറിന്‍റെ കമന്റ്.
സോനം കപൂറിനും ഭര്‍ത്താവ് ആനന്ദ് അഹൂജയ്‌ക്കും കഴിഞ്ഞ ഓഗസ്റ്റിലാണ് ഒരു ആണ്‍കുഞ്ഞ് പിറന്നത്. തങ്ങളുടെ ഇന്‍സ്റ്റഗ്രാമിലൂടെയാണ് കുഞ്ഞ് പിറന്ന കാര്യവും താര ദമ്പതികൾ അറിയിച്ചത്. ‘യാത്രയിൽ ഒപ്പം നിന്ന എല്ലാ ഡോക്ടർമാർക്കും നഴ്സുമാർക്കും സുഹൃത്തുക്കൾക്കും കുടുംബാംഗങ്ങൾക്കും നന്ദി. ഇത് ഒരു തുടക്കമാണെന്നറിയാം, ജീവിതത്തിന് ഇനി മാറ്റങ്ങൾ സംഭവിക്കുമെന്നും ഞങ്ങൾക്കറിയാം’ എന്നായിരുന്നു കുഞ്ഞു ജനിച്ചതിന്റെ സന്തോഷം പങ്കുവെച്ചു കൊണ്ട് ഇരുവരും ഇൻസ്റ്റഗ്രാമിൽ കുറിച്ചത്.
Comments