ന്യൂഡൽഹി: നിർബന്ധിത മതപരിവർത്തന വിഷയത്തിൽ സുപ്രീംകോടതിയിൽ നിലപാട് വ്യക്തമാക്കി ഗുജറാത്ത് സർക്കാർ. മതസ്വാതന്ത്ര്യത്തിൽ മറ്റുള്ളവരെ മതപരിവർത്തനം ചെയ്യാനുള്ള അവകാശം ഉൾപ്പെടുന്നില്ലെന്ന് ഗുജറാത്ത് സർക്കാർ സുപ്രീം കോടതിയെ അറിയിച്ചു. കൂടാതെ വിവാഹം വഴിയുള്ള മതപരിവർത്തനത്തിന് ജില്ലാ മജിസ്ട്രേറ്റിന്റെ മുൻകൂർ അനുമതി നിർബന്ധമാക്കുന്ന സംസ്ഥാന നിയമത്തിന്റെ വ്യവസ്ഥയിൽ ഹൈക്കോടതിയുടെ സ്റ്റേ നീക്കാൻ സുപ്രീം കോടതിയോട് അഭ്യർത്ഥിച്ചു.
2003 ലെ സംസ്ഥാന സർക്കാരിന്റെ മതസ്വാതന്ത്ര്യ നിയമത്തിലെ സെക്ഷൻ 5 ന്റെ പ്രവർത്തനം, ഗുജറാത്ത് ഹൈക്കോടതി 2021 ഓഗസ്റ്റ് 19, 26 തീയതികളിലെ ഉത്തരവുകളിലൂടെ സ്റ്റേ ചെയ്തിരുന്നു. ഇത് നീക്കം ചെയ്യാനാണ് ഗുജറാത്ത് സർക്കാർ സുപ്രീംകോടതിയെ സമീപിച്ചത്.
അഭിഭാഷകനായ അശ്വിനി ഉപാധ്യായയുടെ പൊതുതാൽപര്യ ഹർജിക്ക് മറുപടിയായി സമർപ്പിച്ച സത്യവാങ്മൂലത്തിൽ, ഗുജറാത്തിൽ ബലപ്രയോഗത്തിലൂടെയോ വഞ്ചനയിലൂടെയോ വഞ്ചനാപരമായ മാർഗങ്ങളിലൂടെയോ മതപരിവർത്തനം നടത്തുന്നത് തടയുന്നതിനുള്ള വ്യവസ്ഥകൾ നടപ്പിലാക്കുന്നതിനായി, ഹൈക്കോടതിയുടെ സ്റ്റേ റദ്ദാക്കണമെന്ന് ആവശ്യപ്പെട്ട് അപേക്ഷ നൽകിയതായി ഗുജറാത്ത് സർക്കാർ വ്യക്തമാക്കി. മതസ്വാതന്ത്ര്യത്തിനുള്ള മൗലികാവകാശത്തിൽ മറ്റുള്ളവരെ ഒരു പ്രത്യേക മതത്തിലേക്ക് പരിവർത്തനം ചെയ്യാനുള്ള അവകാശം ഉൾപ്പെടുന്നില്ലെന്ന് ഗുജറാത്ത് സർക്കാർ കൂട്ടിച്ചേർത്തു.
മുൻകൂർ അനുമതി വാങ്ങുന്നത് നിർബന്ധിത മതപരിവർത്തനമെന്ന രീതിയെ ഒഴിവാക്കുകയും രാജ്യത്തെ എല്ലാ പൗരന്മാർക്കും ഉറപ്പുനൽകുന്ന വിവേചനശക്തി സ്വാതന്ത്ര്യം സംരക്ഷിക്കുകയും ചെയ്യുന്നു.’ ഒരു മതം ഉപേക്ഷിച്ച് മറ്റൊരു മതം സ്വീകരിക്കുന്ന പ്രക്രിയ യഥാർത്ഥവും സ്വമേധയാ ഉള്ളതും സത്യസന്ധവും ബലപ്രയോഗം, വഞ്ചന, വഞ്ചനാപരമായ മാർഗങ്ങൾ എന്നിവയിൽ നിന്ന് മുക്തവുമാണെന്ന് ഉറപ്പാക്കാനുള്ള മുൻകരുതലുകളാണ് സെക്ഷൻ 5-ൽ അനുശാസിക്കുന്ന നടപടികളെന്ന് ഗുജറാത്ത് സർക്കാർ ചൂണ്ടിക്കാട്ടി.
നിർബന്ധിത മതപരിവർത്തനം ദേശീയ സുരക്ഷയ്ക്ക് അപകടമുണ്ടാക്കുമെന്നും പൗരന്മാരുടെ മതസ്വാതന്ത്ര്യത്തെ തടസ്സപ്പെടുത്തുമെന്നും നവംബർ 14 ന് സുപ്രീം കോടതി പറഞ്ഞിരുന്നു.ഈ പ്രശ്നം പരിഹരിക്കാൻ ആത്മാർത്ഥമായ ശ്രമങ്ങൾ നടത്താനും കേന്ദ്രത്തോട് അത് ആവശ്യപ്പെട്ടിരുന്നു.വഞ്ചനയിലൂടെയും, വശീകരണത്തിലൂടെയും, ഭീഷണിപ്പെടുത്തിയും ഉള്ള മതംമാറ്റം അവസാനിപ്പിച്ചില്ലെങ്കിൽ വളരെ വിഷമകരമായ സാഹചര്യം ഉടലെടുക്കുമെന്ന് കോടതി മുന്നറിയിപ്പ് നൽകിയിരുന്നു. ഇത് സംബന്ധിച്ച് നിലപാട് വ്യക്തമാക്കാൻ സുപ്രീംകോടതി കേന്ദ്രത്തോട് ആവശ്യപ്പെട്ടിരുന്നു. ഇതേ തുടർന്ന് കേന്ദ്രസർക്കാർ സുപ്രീംകോടതിയിൽ നിലപാട് വ്യക്തമാക്കി സത്യവാങ്മൂലം സമർപ്പിച്ചിരുന്നു.
