ജയ്പൂർ : കോൺഗ്രസ് എവിടെയോ ജീവിച്ചിരിപ്പുണ്ടെന്ന് രാജസ്ഥാൻ മുഖ്യമന്ത്രി അശോക് ഗെഹ്ലോട്ട്. ഗുജറാത്തിൽ ബിജെപി വിരുദ്ധർ ഏറെയാണെന്നും ഗെഹ്ലോട്ട് പറഞ്ഞു. ഗുജറാത്തിൽ ബിജെപിയോട് പരാജയപ്പെട്ടതിന് പിന്നാലെയാണ് ഗെഹ്ലോട്ടിന്റെ പരാമർശം. കോൺഗ്രസ് നാണം കെട്ട തോൽവി നേരിട്ടെങ്കിലും പാർട്ടി ഇപ്പോഴും ഗുജറാത്തിൽ ജീവിക്കുന്നുണ്ടെന്നാണ് ഗെഹ്ലോട്ട് അവകാശപ്പെട്ടത്.
ഗുജറാത്ത് നിയമസഭാ തിരഞ്ഞെടുപ്പിൽ ബിജെപി വിജയിച്ചിരിക്കാം. പക്ഷേ അവിടെ ഇപ്പോഴും വലിയ രീതിയിൽ സർക്കാർ വിരുദ്ധ പ്രവണതകൾ ഉണ്ട്. അതിനർത്ഥം കോൺഗ്രസ് എവിടെയോ ജീവിച്ചിരിക്കുന്നു എന്നാണ്. തത്വങ്ങളുടെയും പ്രത്യയശാസ്ത്രത്തിന്റെയും പോരാട്ടത്തിൽ കോൺഗ്രസ് വിജയിച്ചതിൽ സന്തോഷമുണ്ടെന്നും കോൺഗ്രസ് മുതിർന്ന നേതാവ് ജയ്പൂരിൽ പറഞ്ഞു.
നിയമസഭാ തെരഞ്ഞെടുപ്പിൽ മോശം പ്രകടനം കാഴ്ചവെച്ചതിന് പിന്നാലെയാണ് ഗെഹ്ലോട്ടിന്റെ പ്രസ്താവന. 182 അംഗ നിയമസഭയിൽ കേവലം 17 സീറ്റുകൾ മാത്രമാണ് പാർട്ടിക്ക് നേടാനായത്. പക്ഷേ അപ്പോഴും ബിജെപി ഉൾപ്പെടെയുളള പാർട്ടികളെ കുറ്റപ്പെടുത്തുകയാണ് നേതാക്കൾ ചെയ്തത്. എഎപിയുടെയും എഐഎംഐഎമ്മിന്റെയും തിരഞ്ഞെടുപ്പിലെ മോശം പ്രകടനത്തെയും കോൺഗ്രസ് നേതാക്കൾ വിമർശിക്കുകയാണ്.
Comments