ലക്‌നൗ: ദീപിക പദുക്കോണും ഷാരൂഖ് ഖാനും ഒന്നിച്ചഭിനയിച്ച പത്താൻ സിനിമയിലെ ഗാനം വിവിദമായതിന് പിന്നാലെ കേസെടുത്ത് യുപി പോലീസ്. ലക്‌നൗ പോലീസാണ് കേസ് രജിസ്റ്റർ ചെയ്തിരിക്കുന്നത്. വിവാദ ഗാനത്തിൽ ദീപികയുടെ മുഖത്തിന് പകരം യുപി മുഖ്യമന്ത്രി യോഗി ആദിത്യനാഥിന്റെ മുഖം മോർഫ് ചെയ്ത് വച്ച് പാട്ടിലെ ദൃശ്യങ്ങൾ പ്രചരിപ്പിച്ചതിനെതിരെയാണ് നടപടി.
ട്വിറ്ററിലായിരുന്നു മോർഫ് ചെയ്ത ദൃശ്യങ്ങൾ വൈറലായത്. അസാർsrk എന്ന ട്വിറ്റർ ഹാൻഡിലാണ് ഇത് പങ്കുവച്ചിരിക്കുന്നത്. ഷാരൂഖ് ഖാനോട് ചേർന്നു നിൽക്കുന്ന നടി ദീപിക പദുക്കോണിന്റെ സ്ഥാനത്ത് യുപി മുഖ്യമന്ത്രി യോഗി ആദിത്യനാഥിന്റെ മുഖം മോർഫ് ചെയ്ത് വച്ചായിരുന്നു പോസ്റ്റ് ചെയ്തത്. ട്വീറ്റ് വൈറലായതോടെ നിയമനടപടി സ്വീകരിക്കണമെന്ന ആവശ്യം ശക്തമായി. ഐടി ആക്ട് പ്രകാരവും ഐപിസിയുടെ പ്രസക്ത വകുപ്പുകൾ ചുമത്തിയുമാണ് കേസെടുത്തിരിക്കുന്നത്. വിവാദമായ ട്വിറ്റർ പേജ് ഹാൻഡിൽ ചെയ്യുന്നയാളെ കണ്ടെത്താനുള്ള ശ്രമത്തിലാണ് പോലീസിന്റെ സൈബർ വിഭാഗമെന്ന് അധികൃതർ അറിയിച്ചു.
Comments