ന്യൂഡൽഹി: സൈനികരേ നേരിട്ടോ അല്ലാതെയോ വിമർശിക്കരുതെന്ന ആഹ്വാനവുമായി വിദേശകാര്യമന്ത്രി എസ്.ജയ്ശങ്കർ. സൈനികരെ ആദരിക്കുകയും ബഹുമാനിക്കുകയുമാണ് വേണ്ടതെന്നും അദ്ദേഹം ഓർമ്മിപ്പിച്ചു. സ്വന്തം ജീവൻ പോലും മറന്നാണ് ഓരോ സൈനികരും രാജ്യത്തെ കാക്കുന്നതെന്നും അദ്ദേഹം വ്യക്തമാക്കി.
മർദ്ദിക്കപ്പെടുന്ന വാക്കുകളും സൈനികർക്കെതിരെ ഉപയോഗിക്കരുതെന്നും മന്ത്രി പറഞ്ഞു. 13,000 അടി ഉയരത്തിൽ സ്ഥിതി ചെയ്യുന്ന യാങ് സെയിൽ ഇന്ത്യൻ പട്ടാളം കാവൽ നിൽക്കുകയാണെന്നും അദ്ദേഹം പറഞ്ഞു. അതിർത്തിയിലെ പിന്മാറ്റത്തിന് ഇന്ത്യയും ചൈനയുമായി ചർച്ച നടത്തുന്നുണ്ടെന്നും അദ്ദേഹം വ്യക്തമാക്കി. ചൈനയോട് ഇന്ത്യയ്‌ക്ക് നിസ്സംഗ നിലപാടെന്ന പ്രതിപക്ഷ വിമർശനത്തോടായിരുന്നു ജയശങ്കറിന്റെ രൂക്ഷ പ്രതികരണം.
രാഷ്‌ട്രീയ വിമർശനങ്ങളാകാമെന്നും എന്നാൽ സൈനികരോടടുള്ള അനാദരവ് എക്കാലവും അംഗീകരിക്കാനാവില്ലെന്നും എസ് ജയ്ശങ്കർ പാർലമെൻറിൽ പറഞ്ഞു. അവരെ അധിക്ഷേപിക്കുന്ന തരത്തിലുള്ള വാക്കുകൾ ഉപയോഗിക്കരുതെന്നും താക്കീത് നൽകി. സൈനികരെ വിമർശിച്ച രാഹുൽ ഗാന്ധിയുടെ പേര് പരാമർശിക്കാതെയാണ് മന്ത്രി പാർലമെന്റിൽ ആഞ്ഞടിച്ചത്. അതിർത്തിയിൽ നടക്കുന്ന സംഘർഷങ്ങളിൽ വിദേശകാര്യമന്ത്രി ശ്രദ്ധാലുവാകണമെന്നും എന്താണ് നടക്കുന്നതെന്ന് മനസിലാക്കണമെന്നുമായിരുന്നു രാഹുലിന്റെ പ്രസ്താവന.
Comments