2005-ൽ പുറത്തിറങ്ങിയ ബോയ് ഫ്രണ്ട് എന്ന ചിത്രത്തിലൂടെ പ്രേക്ഷകർക്ക് സുപരിചിതയായ നടിയാണ് ഹണി റോസ്. നടിയുടെ രണ്ടാമത്തെ തിരിച്ചുവരവായിരുന്നു ട്രിവാൻഡ്രം ലോഡ്ജ് എന്ന സിനിമ. ചിത്രത്തിലെ ധ്വനി നമ്പ്യാർ എന്ന കഥാപാത്രം ഏറെ പ്രേക്ഷകപ്രീതി നേടിയിരുന്നു. ഏതാനും നാളുകൾക്ക് മുമ്പ് പുറത്തിറങ്ങിയ മോൺസ്റ്റർ ആണ് നടിയുടെ ഏറ്റവുമൊടുവിലത്തെ മലയാള ചിത്രം.
ഉദ്ഘാടന വേളകളിൽ സജീവമായ നടി പലപ്പോഴും ട്രോളുകൾക്ക് വിധേയയായിട്ടുണ്ട്. കേരളത്തിലെവിടെ ഉദ്ഘാടനം നടന്നാലും അവിടെ ഹണി റോസ് ഉണ്ടാകുമെന്ന തരത്തിലായിരുന്നു ട്രോളുകൾ പ്രത്യക്ഷപ്പെട്ടത്. പിന്നീട് മാദ്ധ്യമങ്ങൾക്ക് നൽകിയ അഭിമുഖങ്ങളിൽ ട്രോളുകളെക്കുറിച്ച് നടി പ്രതികരിച്ചിരുന്നു. എല്ലാം വളരെ പോസിറ്റീവായാണ് കാണുന്നതെന്നും ട്രോളുകൾ വായിച്ച് ചിരിക്കാറുണ്ടെന്നുമായിരുന്നു പ്രതികരണം. ഇപ്പോഴിതാ തന്റെ ഫേസ്ബുക്ക് പേജിലൂടെ ഇഷ്ടപ്പെട്ട ട്രോളുകൾ പങ്കുവച്ചിരിക്കുകയാണ് നടി.
52-ാമത് സംസ്ഥാന ചലച്ചിത്ര അവാർഡിൽ മികച്ച ഉദ്ഘാടകയായി തിരഞ്ഞെടുക്കപ്പെട്ട നടി, ഒരു ദിവസം ഏറ്റവുമധികം പ്രാവശ്യം കത്രിക എടുക്കുന്നയാൾ എന്നിങ്ങനെ പറഞ്ഞുകൊണ്ട് ട്രോളന്മാർ തയ്യാറാക്കിയ സൃഷ്ടികളാണ് ഹണി റോസ് പങ്കുവച്ചത്. നടിയുടെ പോസ്റ്റിന് താഴെ നിരവധി പേരാണ് കമന്റുമായി എത്തിയിരിക്കുന്നത്. ട്രോളുകളെ പോസിറ്റീവായി കാണുന്ന നടിയുടെ മനോഭാവം കയ്യടി അർഹിക്കുന്നതാണെന്നായിരുന്നു ഭൂരിഭാഗം പേരും അഭിപ്രായപ്പെട്ടത്. മലയാളക്കരയുടെ തേൻപൂവിന് ആശംസകളെന്നും സെൽഫ് ട്രോളിന് അഭിനന്ദനങ്ങളെന്നും പോകുന്നു ചില കമന്റുകൾ.
ഹണി റോസിന്റെ ഫേസ്ബുക്ക് പോസ്റ്റ് കാണാം..
Comments