കോഴിക്കോട്: വിവാദങ്ങൾക്ക് പിന്നാലെ നല്ല സമയം എന്ന ഒമർ ലുലു ചിത്രം തിയറ്ററിൽ നിന്നും പിൻവലിച്ചു. ഒമർ ലുലു തന്നെയാണ് ഇക്കാര്യം ഫെയ്സ്ബുക്കിലൂടെ അറിയിച്ചിരിക്കുന്നത്. ബാക്കി കാര്യങ്ങൾ കോടതി വിധി അനുസരിച്ച് തീരുമാനിക്കുമെന്നും സംവിധായകൻ വ്യക്തമാക്കി. ചിത്രത്തിനെതിരെ എക്സൈസ് വകുപ്പ് കേസെടുത്തതിന് പിന്നാലെയാണ് അണിയറ പ്രവർത്തകരുടെ തീരുമാനം.
സംവിധായകന്‍, നിര്‍മാതാവ് എന്നിവര്‍ക്കെതിരെയാണ് എക്സൈസ് വകുപ്പ് കേസെടുത്തിരിക്കുന്നത്. ട്രെയിലറില്‍ ലഹരി വസ്തുക്കളുടെ ഉപയോഗം ഉള്‍പ്പെടുത്തിയതാണ് കേസെടുക്കാൻ കാരണം. അബ്കാരി, NDPS നിയമങ്ങള്‍ പ്രകാരം എക്സൈസ് കോഴിക്കോട് റേഞ്ചാണ് കേസ് എടുത്തത്.
സിനിമയുടെ റിലീസിന് പിന്നാലെ ചിത്രത്തിലെ ഒരു നായിക മയക്കുമരുന്ന് ഉപയോഗത്തെ അനുകൂലിക്കുന്ന പരാമര്‍ശങ്ങള്‍ നടത്തിയതും ഏറെ വിവാദമായിരുന്നു. വെള്ളിയാഴ്ചയാണ് ഒമര്‍ ലുലു സംവിധാനം ചെയ്ത ‘നല്ല സമയം’ തിയറ്ററുകളിലെത്തിയത്. ഇര്‍ഷാദാണ് ചിത്രത്തില്‍ നായകന്‍. നീന മധു, ഗായത്രി ശങ്കര്‍, നോറ ജോണ്‍സണ്‍, നന്ദന സഹദേവന്‍, സുവൈബത്തുല്‍ ആസ്ലമിയ്യ എന്നീ പുതുമുഖങ്ങളാണ് നായികമാര്‍.
Comments