വർ​ഗീയതയുടെ വിഷവിത്തുകൾ വിതറുന്നു; കലാമേളകൾക്ക് ഇനി പാചകം ചെയ്യില്ല എന്ന് പഴയിടം മോഹനൻ നമ്പൂതിരി

തിരുവനന്തപുരം: സ്കൂൾ കലോത്സവത്തിന് ഇനി ഭക്ഷണം പാചകം ചെയ്യില്ലെന്ന് പഴയിടം മോഹനൻ നമ്പൂതിരി. കുട്ടികളു‌ടെ കലോത്സവത്തിൽ പോലും വർ​ഗീയതയുടെയും ജാതീയതയുടെയും വിഷവിത്തുകൾ വാരിയെറിയുന്ന കാലഘട്ടമാണ്. ഇത്തവണത്തെ വിവാദങ്ങൾ തന്നെ വേദനിപ്പിച്ചു എന്നും അദ്ദേഹം മാദ്ധ്യമങ്ങളോട് പറഞ്ഞു.

സ്കൂൾ കലമേളക്ക് ഭക്ഷണം പാചകം ചെയ്യുന്നത് നിർത്താൻ മുമ്പ് ഒരിക്കൽ തീരുമാനിച്ചിരുന്നു. എന്നാൽ സർക്കാർ സമ്മർദ്ദം കൊണ്ടാണ് വീണ്ടും മേളക്ക് എത്തിയത്. ഇനി ടെൻഡറിൽ പങ്കെടുക്കില്ല. പുതിയ കാലത്ത് ഓരോത്തരും ഓരോ ആരോപണങ്ങളുമായി രം​ഗത്തെത്തുകയാണ്. മാംസഭക്ഷണം ഉൾക്കൊള്ളുന്നില്ല എങ്കിലും കലോത്സവത്തിന് ഇനി താൻ ഉണ്ടാകില്ല.

കലോത്സവത്തിന് അടുത്ത വർഷം മുതൽ സസ്യേതര വിഭവങ്ങൾ ഒരുക്കുമെന്ന് കഴിഞ്ഞ ദിവസം വിദ്യാഭ്യാസ മന്ത്രി വി.ശിവൻകുട്ടി പ്രഖ്യാപിച്ചിരുന്നു. പ്രായോഗിക ബുദ്ധിമുട്ടുകൾ ഉണ്ടെങ്കിലും സർക്കാർ തീരുമാനിച്ചാൽ എപ്പോൾ വേണമെങ്കിലും നോൺവെജ് വിളമ്പാമെന്ന് പഴയിടം മോഹനൻ നമ്പൂതിരിയും പ്രതികരിച്ചിരുന്നു. കലോത്സവത്തിൽ നോൺ വെജ് വിളമ്പുന്നതിൽ തനിക്ക് യാതൊരു എതിർപ്പുമില്ലെന്നും നോൺ വെജ് വിളമ്പണോ വേണ്ടയോ എന്ന് തീരുമാനിക്കേണ്ടത് സ‍ർക്കാരാണെന്നും പഴയിടം പറഞ്ഞു.