ലഹരിയ്‌ക്കെതിരെ സേവാഭാരതി; മാജികിലൂടെ ലഹരിവിരുദ്ധ സന്ദേശം പങ്കുവെച്ച് സത്യൻ ശങ്കറും സംഘവും

ആലപ്പുഴ: പുതു തലമുറയ്‌ക്കിടയിൽ ലഹരി ഉപയോഗം വർദ്ധിക്കുന്നതായി റിപ്പോർട്ടുകൾ പുറത്തുവന്നതോടെ ഏറെ ജാഗ്രതയിലാണ് നാടെങ്ങും. നിരവധി സംഘടനകളുടെയും ക്ലബ്ബുകളുടെയും മറ്റും നേതൃത്വത്തിൽ നിരവധി ഇടങ്ങളിലാണ് ബോധവത്കരണ പരിപാടികൾ നടക്കുന്നത്. എന്നാൽ വ്യത്യസ്തമായ രീതിയിലൂടെ ബോധവത്കരണ പരിപാടി സംഘടിപ്പിച്ചിരിക്കുകയാണ് സേവാഭാരതി.

മാജിക് ഷോയിലൂടെയാണ് സേവാഭാരതി ആലപ്പുഴ ബീച്ചിൽ ലഹരി വിരുദ്ധ ബോധവകത്കരണ പരിപാടി നടത്തിയത്. മാന്ത്രികൻ സത്യൻ ശങ്കറും സംഘവും ലഹരിവിരുദ്ധ സന്ദേശം ഉൾക്കൊണ്ടാണ് മാജിക് ഷോ അവതരിപ്പിച്ചത്. മാജികിലൂടെ ലഹരി ഉപയോഗത്തിന്റെ ഭീകരത എത്തിക്കും വിധത്തിലായിരുന്നു അദ്ദേഹത്തിന്റെ പ്രകടനം.

സേവാഭാരതി ജില്ലാ ജനറൽ സെക്രട്ടറി ശ്രീജിതാണ് പരിപാടി ഉദ്ഘാടനം ചെയ്തത്. യുവതലമുറയെ കാർന്ന് തിന്നുന്ന ലഹരിയിൽ നിന്ന് യുവത്വത്തെ മോചിപ്പിക്കുന്നതിന് ആവശ്യം മികച്ച രീതിയിലുള്ള മാർഗ നിർദേശങ്ങളാണെന്നും അതിനായി മാതാപിതാക്കളും വീട്ടിലെ ഓരോ അംഗങ്ങളും തയ്യാറാകണമെന്ന് അദ്ദേഹം പറഞ്ഞു. സേവഭാരതിയുടെ വിവിധ ചുമതലകളുള്ളവർ പരിപാടിയ്‌ക്ക് നേതൃത്വം വഹിച്ചു.