ന്യൂഡൽഹി: പ്രതിഷേധ സമരത്തിൽ രാഷ്ട്രീയം കളിക്കാനെത്തിയ കോൺഗ്രസ് നേതാവും മുൻ ബോക്സിംഗ് താരവുമായ വിജേന്ദർ സിംഗിനെ വേദിയിൽ നിന്നും പുറത്താക്കി ഗുസ്തി താരങ്ങൾ. ഇത് രാഷ്ട്രീയം കളിക്കാനുള്ള വേദിയല്ലെന്നും അതിനാൽ വിജേന്ദർ വേദിവിടണമെന്നും പ്രതിഷേധക്കാർ ആവശ്യപ്പെടുകയായിരുന്നു.
കഴിഞ്ഞ ദിവസം സമരക്കാരെ കാണാനെത്തിയ സിപിഎം പൊളിറ്റ്ബ്യുറൊ അംഗം ബൃന്ദാകാരാട്ടിനെയും സമാനരീതിയിൽ സമരവേദിയിൽ നിന്നും പുറത്താക്കിയിരുന്നു. ഒളിമ്പിക്സ് വെങ്കല മെഡൽ ജേതാവ് ബജിറംഗ് പുനിയ ഇടപെട്ടാണ് ബൃന്ദാ കാരാട്ടിനെ വേദിയിൽ നിന്നും ഇറക്കിവിട്ടത്. ഇത് രാഷ്ട്രീയം കളിക്കാനുള്ള വേദിയല്ലെന്നും ഫെഡറേഷൻ അദ്ധ്യക്ഷനെതിരായ പ്രതിഷേധമാണെന്നും താരങ്ങൾ പറഞ്ഞു. ഇതിൽ നിങ്ങൾ രാഷ്ട്രീയ നിറം കൊണ്ടുവരരുത്. ദയവായി വേദിവിട്ട് പോകണമെന്നും ബൃന്ദയോട് താരങ്ങൾ ആവശ്യപ്പെട്ടു.
റസലിംഗ് താരവും ബിജെപി നേതാവുമായ ബബിത ഫോഗട്ട പ്രതിഷേധിക്കുന്ന താരങ്ങളുമായി ചർച്ച നടത്തിയിരുന്നു. പ്രതിഷേധിക്കുന്നവരുടെ ആവശ്യങ്ങൾ പരിഹരിക്കാനാണ് ശ്രമിക്കുന്നതെന്ന് ബബിത പറഞ്ഞു. താരങ്ങൾക്കൊപ്പമാണ് സർക്കാർ എന്നും ബബിത ചർച്ചയ്ക്ക് ശേഷം മാദ്ധ്യമങ്ങളോട് വ്യക്തമാക്കി.
Comments