കൊൽക്കത്ത: പശ്ചിമബംഗാളിലെ ധോലഗുരിൽ നിന്നുള്ള 102-കാരനായ മംഗള കാന്തി റോയിയെ രാജ്യം പരമോന്നത സിവിലയൻ ബഹുമതിയായ പദ്മശ്രീ നൽകി ആദരിച്ചിരുന്നു. സംസ്ഥാനത്തെ ഏറ്റവും പ്രായമേറിയ നാടോടി ഗായകനായ മംഗള കാന്തിക്ക് കലയിലും സംഗീതത്തിലും നൽകിയ സംഭാവനയ്‌ക്കാണ് അംഗീകാരം ലഭിച്ചത്.
സംഗീത ഉപകരണമായ സരിന്ദയിലൂടെയാണ് ഇദ്ദേഹം ജനഹൃദയങ്ങളിൽ ഇടം പിടിച്ചത്. മംഗള കാന്തി അഞ്ചു വയസ്സുമുതലാണ് സരിന്ദ വായിച്ചു തുടങ്ങിയത്.
ചടങ്ങുകളിൽ സരിന്ദ വായിച്ച് കിട്ടുന്ന തുച്ഛമായ തുകയും സാംസ്കാരിക വകുപ്പ് നൽകുന്ന തുകയും മാത്രമാണ് അദ്ദേഹത്തിന്റെ ഏക വരുമാനം. അതുകൊണ്ട് തന്നെ മംഗള കാന്തി റോയിയും ഭാര്യ ചമ്പാ റോയിയും ഇപ്പോഴും ദാരിദ്ര്യത്തിലാണ് ജീവിക്കുന്നത്.
വാർദ്ധക്യത്തിൽ ലഭിച്ച അംഗീകാരത്തെ കുറിച്ച് അദ്ദേഹം ദേശീയ മാദ്ധ്യമങ്ങളോട് പറഞ്ഞതിങ്ങനെയാണ്. ” ശതാബ്ദിയിലെത്തിയ തന്നെ വിശിഷ്ടമായ പുരസ്കാരത്തിന് തിരഞ്ഞെടുത്തതിൽ സന്തോഷമുണ്ടെന്നും, എന്നാൽ കലാരൂപം ഒരിക്കലും തന്നെ സാമ്പത്തിക ബുദ്ധിമുട്ടുകളിൽ നിന്ന് കരകയറാൻ സഹായിച്ചിട്ടില്ലെന്നും അദ്ദേഹം പറഞ്ഞു. ഇതിൽ അതിയായ ദുഃഖമുണ്ടെന്നും റോയ് പറയുന്നു. കൂടാതെ, താൻ ദരിദ്രത്തനാണെങ്കിലും കലയിൽ സമ്പന്നനാണ്. അതുകൊണ്ട് തന്നെ സമൂഹത്തിൽ നിന്നും ആദരവും കിട്ടുന്നുണ്ട്”.
ഇപ്പോൾ സരിന്ദ എന്ന സംഗീത ഉപകരണം വായിക്കുന്നവർ വളരെ കുറവാണ്, അതിനാൽ സരിന്ദയുടെ സംരക്ഷണം ആവശ്യമാണെന്നും മംഗള കാന്തി കൂട്ടി ചേർത്തു.
Comments