‘സ്വന്തമായി പരിഹാരം കാണാനും അറിയാം, മറ്റ് രാജ്യങ്ങൾക്കു വേണ്ടി പരിഹാരം കണ്ടെത്താനും അറിയാം’; ഭാരതത്തെ പ്രശംസിച്ച് യുഎൻ ജനറൽ അസംബ്ലി ചീഫ്

ന്യൂഡൽഹി: ഭാരതത്തെ പ്രശംസിച്ച് യുഎൻ ജനറൽ അസംബ്ലി ചീഫ് സിസബ കൊറോസി. ‘ആഗോള ദക്ഷിണേഷ്യയുടെ നേതാക്കളിൽ ഒരാളാണ് ഇന്ത്യ’ എന്നാണ് സിസബ കൊറോസി വിശേഷിപ്പിച്ചത്.

യുക്രെയ്ൻ-റഷ്യ യുദ്ധത്തിന്റെയും ആഗോള സാമ്പത്തിക മാന്ദ്യത്തിന്റെയും വെല്ലുവിളികൾക്കിടയിലും ഇന്ത്യ ഒരു വർഷം നീണ്ടുനിൽക്കുന്ന G-20 അദ്ധ്യക്ഷ സ്ഥാനം ഏറ്റെടുത്തതിനെയും അദ്ദേഹം പ്രശംസിച്ചു. ലോക പരിവർത്തനത്തെപ്പറ്റിയുള്ള ഇന്ത്യയുടെ തന്ത്രപരമായ ചിന്തയും യുഎൻ ബോഡിയും തമ്മിൽ വലിയ സാമ്യമുണ്ടെന്ന് കൊറോസി പറഞ്ഞു.

‘ലോകത്തിലെ ഏറ്റവും വലിയ സമ്പദ്‌വ്യവസ്ഥകളിലൊന്നാണ് ഇന്ത്യ, ലോകത്തിലെ ഏറ്റവും വലിയ ജനസംഖ്യയുള്ള രാജ്യമായി ഇന്ത്യ മാറുന്നു. ഈ ലോകം വളരെ വേഗത്തിൽ മാറിക്കൊണ്ടിരിക്കുകയാണെന്ന് ഇന്ത്യക്ക് നല്ല ധാരണയുണ്ട്. നമ്മൾ അഭിമുഖീകരിക്കുന്ന പല പ്രതിസന്ധികളും, വിവിധ രൂപങ്ങളിൽ, പരസ്പരബന്ധിതമായ രീതിയിൽ ലോകമെമ്പാടും അനുഭവിക്കുകയാണ്. ഇന്ത്യ സ്വന്തമായി പരിഹാരങ്ങൾ തേടുകയാണ്. ആ പരിഹാരങ്ങൾ തനിക്കുവേണ്ടി മാത്രമല്ല, മറ്റു പല രാജ്യങ്ങൾക്കും കൂടി വേണ്ടിയാണ്’ – അദ്ദേഹം പറഞ്ഞു.

കേന്ദ്ര വിദേശകാര്യ മന്ത്രി എസ് ജയശങ്കറിന്റെ ക്ഷണപ്രകാരം ത്രിദിന സന്ദർശനത്തിനായി കൊറോസി ഇന്ന് ഇന്ത്യയിലെത്തും. കഴിഞ്ഞ വർഷം സെപ്റ്റംബറിൽ യുഎൻ ജനറൽ അസംബ്ലിയുടെ 77-ാമത് സമ്മേളനത്തിന്റെ പ്രസിഡന്റായി ചുമതലയേറ്റതിന് ശേഷമുള്ള അദ്ദേഹത്തിന്റെ ആദ്യ ഉഭയകക്ഷി സന്ദർശനമാണിത്. വളരെ പ്രതീക്ഷയോടെയാണ് താൻ ഇന്ത്യയിലേക്ക് യാത്ര ചെയ്യുന്നതെന്ന് സന്ദർശനത്തിന് മുന്നോടിയായി സിസബ കൊറോസി പറഞ്ഞു.