ചൈനീസ് ആപ്പുകൾക്ക് പൂട്ട് വീഴും; വാതുവെപ്പ് ആപ്പുകളും ലോൺ ആപ്പുകളും നിരോധിക്കാനൊരുങ്ങി കേന്ദ്രം

ന്യൂഡൽഹി : ചൈനീസ് ബന്ധമുള്ള ആപ്പുകൾക്ക് പൂട്ടിടാനൊരുങ്ങി കേന്ദ്ര സർക്കാർ. 138 വാതുവെപ്പ് ആപ്പുകളും 94 ലോൺ ആപ്പുകളുമാകും ഇന്ത്യയിൽ നിരോധിക്കുക.ഇത് സംബന്ധിച്ച് നടപടികൾ ആരംഭിച്ചതായി ഐടി മന്ത്രാലയം അറിയിച്ചു. കേന്ദ്ര ആഭ്യന്തര മന്ത്രാലയത്തിന്റെ ശുപാർശ പ്രകാരമാണ് ഐടി മന്ത്രാലയത്തിന്റെ നടപടി.

ഇത്തരം ആപ്പുകൾ ഇന്ത്യയുടെ പരമാധികാരത്തിന് ഭീക്ഷണി ഉയർത്തുന്നുവെന്ന് ചൂണ്ടിക്കാട്ടിയാണ് നടപടി. ഐടി ആക്ടിലെ സെക്ഷൻ 69 പ്രകാരമാണ് നടപടി എടുക്കുന്നത്. ആറ് മാസം മുൻപ് ചൈനയിൽ നിന്ന് വായ്പ നൽക്കുന്ന 28 ആപ്പുകളെക്കുറിച്ച് കേന്ദ്ര ആഭ്യന്തരമന്ത്രാലയം അന്വേഷണം ആരംഭിച്ചിരുന്നു.ഇത്തരം ആപ്പുകൾ വഴി രാജ്യത്തെ നിരവധി പൗരന്മാരുടെ വിവരങ്ങൾ ചൈന ചോർത്തിയെടുക്കുന്നതായി വിവരം ലഭിച്ചിരുന്നു.

മൊബൈൽ ആപ്പ് വഴി ചെറിയ തുകയ്‌ക്ക് വായ്പ നൽകി സാധാരണക്കാരെ കൊള്ളയടിക്കുകയാണെന്ന് നിരവധി പേരുടെ പരാതിയുടെ അടിസ്ഥാനത്തിലാണ് കേന്ദ്ര സർക്കാർ നടപടി ശക്തമാക്കിയത്. തെലങ്കാന, ഉത്തർപ്രദേശ്,ഒഡീഷ തുടങ്ങിയ സംസ്ഥാനങ്ങളിലും കേന്ദ്ര രഹസ്യാന്വേഷണ ഏജൻസികൾക്ക് ഈ ആപ്പുകൾക്ക് എതിരെ ശക്തമായ തീരുമാനം എടുക്കാൻ കേന്ദ്ര ആഭ്യന്തര മന്ത്രാലയത്തോട് ആവശ്യപ്പെട്ടുണ്ട്.