കോഴിക്കോട് :ഉഷ സ്കൂൾ ഓഫ് അത്ലറ്റിക്സിനെതിരെ നടക്കുന്ന കടന്നാക്രമണങ്ങളിൽ സർക്കാരിന് ലാഘവ ബുദ്ധി എന്ന് ബിജെപി സംസ്ഥാന ജനറൽ സെക്രട്ടറി എം.ടി രമേശ്. സംഭവം പ്രതിഷേധാർഹം ആണെന്നും അദ്ദേഹം പറഞ്ഞു.
കഴിഞ്ഞ ദിവസം ഉഷ സ്കൂൾ ഓഫ് അത്ലറ്റിക്സിന്റെ സ്ഥലത്ത് പനങ്ങാട് പഞ്ചായത്തിന്റെ അറിവോടെ അനധികൃത നിർമാണം നടത്തുന്നതായി പി.ടി. ഉഷ പരാതി പറഞ്ഞിരുന്നു. ഇതൊരു പ്രാദേശിക വിഷയം മാത്രമാണെന്നും പെരുപ്പിച്ചു കാണിക്കേണ്ട കാര്യമില്ലെന്നുമായിരുന്നു കായിക മന്ത്രിയുടെ പ്രതികരണം. സ്കൂളിനെതിരെ നടക്കുന്ന സിപിഎമ്മിന്റെ കടന്നാക്രമണങ്ങളും കയ്യേറ്റവും പ്രതിഷേധാർഹമാണെന്ന് എം.ടി.രമേശ് പറഞ്ഞു.
പ്രശ്നത്തെ ലാഘവത്തോടെ കൂടിയാണ് കായിക മന്ത്രി കണ്ടതെന്നും സ്കൂളിനെ തകർക്കാനുള്ള രാഷ്ട്രീയപരമായ നീക്കമാണ് നടക്കുന്നതെന്നും അദ്ദേഹം കൂട്ടിച്ചേർത്തു. മുഖ്യമന്ത്രി ഇടപെട്ട് പ്രശ്നങ്ങളിൽ പരിഹാരം ഉണ്ടാക്കാൻ ശ്രമിക്കണമെന്നും കായിക മന്ത്രി നടത്തിയ നിരുത്തരവാദിത്വമായ പ്രസ്താവന പിൻവലിക്കണമെന്നും എംടി രമേശ് ആവശ്യപ്പെട്ടു.
