ബാഗുകൾ മറന്ന് ഇൻഡിഗോ! ഒടുവിൽ ഖേദം പ്രകടിപ്പിച്ച് തടിതപ്പി കമ്പനി

ഹൈദരാബാദ്: ഹൈദരാബാദിൽ നിന്ന് വിശാഖപട്ടണത്തിലേക്ക് പറന്ന ഇൻഡിഗോ വിമാനം യാത്രക്കാരുടെ ബാഗുകൾ മറന്നു. യാത്രക്കാരുടെ 37 ബാഗുകൾ ഉപേക്ഷിച്ചാണ് വിമാനം യാത്ര തിരിച്ചത്. വിശാഖപട്ടണത്തെ യാത്രക്കാരുടെ മേൽവിലാസത്തിൽ ബാഗുകൾ എത്തിക്കുമെന്ന് വിമാനക്കമ്പനി അറിയിച്ചു. യാത്രക്കാർക്കുണ്ടായ അസൗകര്യത്തിൽ ഖേദം പ്രകടിപ്പിക്കുന്നതായും കമ്പനിയുടെ പ്രസ്താവനയിൽ പറയുന്നു.

കഴിഞ്ഞമാസം യാത്രക്കാരെ വിമാനത്തിൽ കയറ്റാതെ പുറപ്പെട്ട സംഭവത്തിന് പിന്നാലെയാണ് രീതിയിലുള്ള ഈ സംഭവം . 55 യാത്രക്കാരെയാണ് ബംഗളുരുവിൽ നിന്ന് പുറപ്പെട്ട ഗോഫസ്റ്റ് വിമാനം കയറ്റാതെ പറന്നത്. ബോർഡിംഗ് പാസെടുത്തതിന് ശേഷമായിരുന്നു വിമാനം യാത്രക്കാരെ മറന്ന് യാത്ര തിരിച്ചത്. വിമാനത്തിലൂണ്ടായിരുന്ന ലഗേജുകൾ പിന്നീട് ഡൽഹിയിലെത്തിക്കുകയും ചെയ്തു.

സംഭവത്തിന് പിന്നാലെ ഗോഫസ്റ്റിന് ഡിജിസിഎ കാരണം കാണിക്കൽ നോട്ടീസ് നൽകിയിരുന്നു. ജനുവരി 25-നാണ് എയർലൈൻ അധികൃതർ മറുപടി നൽകുന്നത്. ആശയവിനിമയത്തിൽ വന്ന പിഴവാണ് കാരണമെന്നായിരുന്നു വിശദീകരണം. ഇതിന് പിന്നാലെയാണ് പത്ത് ലക്ഷം രൂപ ഡിജിസിഎ പിഴ ഈടാക്കിയത്.