ദ്വിദിന സന്ദർശനത്തിനായി രാഷ്‌ട്രപതി ദ്രൗപദി മുർമ്മു അരുണാ​ചൽപ്രദേശിൽ

ഇറ്റാന​ഗർ: രാഷ്‌ട്രപതി ദ്രൗപദി മുർമ്മു ദ്വിദിന സന്ദർശനത്തിനായി ഇന്ന് അരുണാ​ചൽപ്രദേശിൽ എത്തും. സംസ്ഥാനത്ത് ഇന്നും നാളെയുമായി വിവധ പരിപാടികളിൽ പങ്കെടുക്കും.

മുർമ്മു ഇന്ന് സംസ്ഥാന രൂപീകരണത്തിന്റെ 37-ാമത് വാർഷികാഘോഷ പരിപാടിയിൽ പങ്കെടുക്കും. തുടർന്ന് ഇറ്റാനഗറിൽ സംസ്ഥാന സർക്കാരിന്റെ പൗര സ്വീകരണ ചടങ്ങിലും രാഷ്‌ട്രപതി പങ്കെടുക്കും. ചൊവ്വാഴ്ച അരുണാചൽ പ്രദേശ് നിയമസഭയുടെ പ്രത്യേക സമ്മേളനത്തെ രാഷ്‌ട്രപതി അഭിസംബോധന ചെയ്യും.‌

“സംസ്ഥാന രൂപീകരണ വാർഷികത്തിൽ അരുണാചൽ പ്രദേശിലെയും മിസോറാമിലെയും ജനങ്ങൾക്ക് ആശംസകൾ. ഈ സംസ്ഥാനങ്ങൾ ഇന്ത്യയുടെ സമ്പന്നമായ സംസ്‌കാരത്തെയും വൈവിധ്യത്തെയും പ്രതിനിധീകരിക്കുന്നു. കുറച്ച് ദിവസങ്ങൾക്ക് മുമ്പ് മിസോറാം സന്ദർശിക്കാനെത്തിയ എനിക്ക് ഊഷ്മളമായ സ്വീകരണമാണ് നൽകിയത്. അത് എന്നെ വല്ലാതെ സ്പർശിച്ചു. ഇന്ന് ഇറ്റാനഗറിലെ സംസ്ഥാന രൂപീകരണ വാർഷികാഘോഷങ്ങൾക്കായി ഞാൻ കാത്തിരിക്കുകയാണ്.” ദ്രൗപദി മുർമ്മു ട്വീറ്റ് ചെയ്തു

1987- ഫെബ്രുവരി 20 നാണ് അരുണാചൽ പ്രദേശിനും മിസോറാമിനും കേന്ദ്രഭരണ പ്രദേശങ്ങളിൽ നിന്ന് സംസ്ഥാന പദവി ലഭിച്ചത്.