ജൽ ജീവൻ മിഷൻ: യുപിയിൽ 81 ലക്ഷത്തിലധികം ഗ്രാമീണ കുടുംബങ്ങൾക്ക് ടാപ്പ് വാട്ടർ കണക്ഷനുകൾ നൽകി യോഗി സർക്കാർ

ലക്നൗ: ജൽ ജീവൻ മിഷന്റെ കീഴിൽ ഉത്തർപ്രദേശിലെ 5 കോടിയിലധികം ആളുകൾക്ക് ഗാർഹിക ടാപ്പുകളിലൂടെ ശുദ്ധമായ കുടിവെള്ളം ലഭിച്ചു തുടങ്ങി. ഔദ്യോഗിക കണക്കുകൾ പ്രകാരം സംസ്ഥാനത്തെ 81 ലക്ഷത്തിലധികം ഗ്രാമീണ കുടുംബങ്ങൾക്കാണ് യോഗിയുടെ നേതൃത്വത്തിലുള്ള സർക്കാർ ടാപ്പ് വാട്ടർ കണക്ഷനുകൾ നൽകിയിരിക്കുന്നത്. രാജ്യത്ത് ജൽ ജീവൻ മിഷന്റെ ‘ഹർ ഘർ ജൽ യോജന’യ്‌ക്ക് കീഴിൽ ടാപ്പ് വാട്ടർ കണക്ഷനുകൾ നൽകുന്നതിൽ ഉത്തർപ്രദേശ് നാലാം സ്ഥാനത്താണ്. ഫെബ്രുവരി 21-ലെ കണക്കുകൾ പ്രകാരം, 1,59,00,575 ടാപ്പ് വാട്ടർ കണക്ഷനുകൾ നൽകിക്കൊണ്ട് ബിഹാർ ഒന്നാമതെത്തിയപ്പോൾ മഹാരാഷ്‌ട്ര 1,07,34,14 ആയി രണ്ടാമതും 91,18,449 ടാപ്പ് വാട്ടർ കണക്ഷനുമായി ഗുജറാത്ത് മൂന്നാമതുമാണ്.

കൊറോണ മഹാമാരിയിൽ നിന്ന് കരകയറുന്ന സാഹചര്യത്തിൽ പോലും ഗ്രാമപ്രദേശങ്ങളിൽ ടാപ്പ് വാട്ടർ കണക്ഷനുകൾ നൽകുന്നത് വളരെ വേഗത്തിൽ യോഗി സർക്കാർ നടത്തിയിട്ടുണ്ട് എന്നത് ശ്രദ്ധേയമാണ്. യുപിയിൽ ഇതുവരെ 81,87,394 ഗ്രാമീണ കുടുംബങ്ങൾക്ക് ടാപ്പ് വാട്ടർ കണക്ഷനുകൾ നൽകിയിട്ടുണ്ടെന്നും 4,91,24,364 ഗ്രാമവാസികൾ ഈ പദ്ധതിയുടെ പ്രയോജനം നേടുന്നുവെന്നും റിപ്പോർട്ടുകളുണ്ട്.

പ്രധാനമന്ത്രി നരേന്ദ്രമോദിയുടെ സ്വപ്ന പദ്ധതി വിവിധ സംസ്ഥാനസർക്കാരുകൾ ഫലപ്രദമായി നടപ്പിലാക്കിയതിലൂടെ യുപിയിലെ 31.1 ശതമാനം ഗ്രാമീണ കുടുംബങ്ങൾക്കും ജാർഖണ്ഡിലെ 30.95 ശതമാനം ഗ്രാമീണ കുടുംബങ്ങൾക്കും പശ്ചിമ ബംഗാളിലെ 30.56 ശതമാനം കുടുംബങ്ങൾക്കും ടാപ്പ് വെള്ളം വിതരണം ഉറപ്പാക്കാൻ കഴിഞ്ഞു. ജാർഖണ്ഡിൽ 2,500-ഉം പശ്ചിമ ബംഗാളിൽ 7,000-ഉം ആണെങ്കിൽ യുപി സർക്കാർ ഗ്രാമങ്ങളിൽ പ്രതിദിനം 30,000-ലധികം ടാപ്പ് കണക്ഷനുകൾ നൽകുന്നുണ്ട്.